12/08/2026
🍰
من الكيكات المفضلة عندي ونحبها هلبه
وبالمكونات البسيطة هذه حتطلع معاكم أفضل انجلش كيك ممكن تجربوها وتقدروا تبيعوها حتى 🥰 .
أول شيء وأهم شيء كوب وربع زبدة حيوانية غير مملحة بدرجة حرارة الغرفة نضربه بمضرب الكيك لين يتكون قوام لين للزبدة ونضيف عليها كوب ونصف سكر ناعم ويفضل تغربلي السكر قبل الاستعمال ونخفقهم كويس لين يكون لون الخليط مايل للابيض يعني قد ما تفدري اضربي الخليط لين تتدهشي 😁
بعدين نضيف 4 بيضات وفانيليا بالتدريج يعني نضيف بالبيضة ونخفق ولما تختفي البيضة نضيف الثانية وهكذا لين نكمل الاربع بيضات وبعدين نضيف كوبين دقيق خاص بالحلويات ونصف ظرف بيكن بودر ونخفق بس ما نبالغ في الخفق مجرد ما يختفي الدقيق نوقف واخر تقدري نضيف ثلث كوب حليب كامل الدسم ومبشور ليمونة🍋
او حتى مبشور برتقال 🍊 وتقدروا تستغنوا عليهم عادي لو مش حابين .
واني حطيتها في قوالب ميني بعد ما دهنتهم زبدة ونعبي تقريبا ثلثين القالب ونخلي الثلث فاضي باش ترتفع كويس الكيكة .
وتقدروا تطيبوها في طاجين انجلش كيك كبير عادي ودخلها فرن مسخن مسبقا على درجة حرارة 160 لمدة 40 دقيقة .
ولو حابين المقادير أدق بالجرامات 👇🏻
🍰 الزبدة = 250 جرام
🍰 السكر الناعم = 250 جرام ((( ولما وزنته طلع كوبين حسيته هلبه ونقصت كمية السكر من عندي وخليتها كوب ونصف )))
🍰 الدقيق = 250 جرام
🍰 الحليب = 75 جرام
🍰 البيكن باودر = 7 جرام ( ملعقة صغيرة + نصف ملعقة صغيرة + ربع ملعقة صغيرة ) بالمقادير هذه تطلع الكمية مضبوطة .
وعلى الوجه حطوا اي شيء متوفر عندكم لوز او زبيب او فواكه مجففة .
