14/10/2026
ကျောက်တစ်ပွင့်ကို ဝယ်ဖို့ဆိုတာ ကျောက်ကိုကြည့်ရုံနဲ့ မပြီးဘူး။ ရောင်းတဲ့လူကိုလည်း ယုံကြည်ဖို့လိုတယ်။
ကျနော့်အမြင်မှာ ကျောက်အရောင်းအဝယ်ဆိုတာ ဒီနေ့တစ်ပွင့်ရောင်းပြီး အမြတ်ရဖို့တစ်ခုတည်း မဟုတ်ဘူး။ ကိုယ့်ဆီက ဝယ်သွားတဲ့သူ နောက်တစ်ခါ ကျောက်ကြည့်ချင်တဲ့အခါ ကိုယ့်ကို သတိရနေဖို့က ပိုအရေးကြီးတယ်။
ဒါကြောင့် ကျနော့်အတွက် အရေးကြီးတာက ကိုယ်ရောင်းချင်တဲ့ကျောက်ကို လူတိုင်းကြိုက်အောင် ပြောဖို့ထက် ကိုယ့်ရှေ့မှာလာကြည့်တဲ့သူက ဒီကျောက်ကို သူ့အမြင်နဲ့သူ စဉ်းစားဆုံးဖြတ်နိုင်ဖို့ပါပဲ။(သူတို့နားမလည်တာကိုတော့ သေချာရှင်းပြပေးရင်းနဲ့ပေါ့)
တစ်ခါတလေ ကျနော်သဘောကျတဲ့ကျောက်ကို လာကြည့်တဲ့သူက မကြိုက်တာလည်း ရှိနိုင်တယ်။ သူသဘောကျတဲ့ကျောက်ကို ကျနော်က သူ့အကြိုက်အတိုင်း ရှင်းပြပေးရတာလည်း ရှိနိုင်တယ်။ အဲ့ဒါက ပုံမှန်ပါပဲ။ လူတိုင်းရဲ့အမြင်က တစ်ပုံစံတည်း မဖြစ်နိုင်ဘူးလေ။
ကျောက်တစ်ပွင့်ကောင်းတယ်ဆိုတာ ပြောလိုက်ရုံနဲ့ ကောင်းသွားတာမဟုတ်ဘူး။ ကိုယ်တိုင်ကြည့်ရမယ်၊ ကိုယ်တိုင်သဘောကျရမယ်၊ ကိုယ်ပေးရမယ့်စျေးနဲ့ တန်တယ်လို့ ကိုယ်တိုင်ခံစားနေရမယ်။
ကျနော်ကတော့ ကျောက်တစ်ပွင့်ကို လူတစ်ယောက်က ဝယ်သွားတာထက် သူဝယ်သွားတဲ့အခါ ကိုယ်ရွေးချယ်ခဲ့တာ မှန်တယ်လို့ စိတ်ထဲမှာ လက်ခံနိုင်ဖို့ကို ပိုအရေးကြီးတယ်လို့ မြင်တယ်။
ဘာလို့လဲဆိုတော့ ကျောက်တစ်ပွင့်ရောင်းပြီးတာနဲ့ ဆက်ဆံရေးက ပြီးသွားတာမဟုတ်ဘူး။ နောက်တစ်ခါ ကျောက်ကြည့်ချင်တဲ့အခါ ကိုယ့်ကို သတိရမလား၊ တစ်ခုခုမေးချင်တဲ့အခါ ကိုယ့်ကို မေးရဲမလား၊ နောက်ဆုံး ကိုယ့်ဆီက ထပ်ဝယ်ဖို့ စိတ်ချမှုရှိမလားဆိုတာတွေကလည်း အရေးကြီးတယ်။
ဒီလိုအရာတွေက တစ်ရက်တည်းနဲ့ ရလာတာမဟုတ်ဘူး။ စကားလှလှပြောလို့လည်း မရဘူး။ အချိန်ကြာလာတာနဲ့အမျှ ကိုယ့်အပြုအမူ၊ ကိုယ့်အရောင်းအဝယ်နဲ့ ကိုယ့်အပေါ်ထားတဲ့ လူတွေရဲ့အတွေ့အကြုံတွေကနေ တဖြည်းဖြည်း တည်ဆောက်သွားရတာ။
ကျနော်လည်း အကုန်သိနေတဲ့သူ မဟုတ်ပါဘူး။ ကိုယ်သိသလောက် လေ့လာတယ်၊ ကိုယ်ကြိုက်တဲ့ကျောက်ကို ဝယ်တယ် ပြီးရင် အတတ်နိုင်ဆုံး စျေးကွက်နဲ့ချိန်ပြီးစျေးအသက်သာဆုံးရောင်းပေးတယ်။
အရောင်းအဝယ်တစ်ခါ အောင်မြင်တာထက် နောက်တစ်ခါလည်း ကိုယ့်ဆီကို စိတ်ချလက်ချ ပြန်လာချင်တဲ့သူ ရှိနေဖို့က ပိုတန်ဖိုးရှိပါတယ်။
ကိုမျိုးမင်းကျော်
GoRuby Gems
