JEWEL HOUSE

Call Directions Contact the business

JEWEL HOUSE Gem Lab

ရှားပါးကျောက်မျက်လောကကျောက်လောကဆိုတာ အတော်လေးကျယ်ပြန့်ပါတယ်။ ကိုယ့်လိုင်းနဲ့ကိုယ် သန်ရာလုပ်ကြတာပါ။ စိန် / အနီအပြာ / ကျော...
05/08/2026

ရှားပါးကျောက်မျက်လောက

ကျောက်လောကဆိုတာ အတော်လေးကျယ်ပြန့်ပါတယ်။ ကိုယ့်လိုင်းနဲ့ကိုယ် သန်ရာလုပ်ကြတာပါ။ စိန် / အနီအပြာ / ကျောက်စိမ်း / ပုလဲ / ရောင်စုံရယ်လို့ အကြမ်းဖျင်းခွဲခြားသိကြတယ်။ နောက်ပိုင်းမှာတော့ ပယင်းတမျိုးပဲသီးသန့်ရောင်းဝယ်သူတွေ၊ ခရမ်းစွဲသီးသန့်တမျိုးထဲလုပ်သူတွေ၊ ပြောင်ခေါင်းစိမ်းတမျိုးထဲရောင်းဝယ်သူတွေ၊ မြကိုပဲသီးသန့်ရောင်းချသူတွေ၊အညံ့ပန်း .. ရွှေတွင်းဝါ .. တိုပက်စ် ... မြပြာ .. ဥဒေါင် ..စသဖြင့် ရောင်းဝယ်စရာကျောက်တွေအတော်လေး ပေါများလာခဲ့ကြတယ်။ ဂျပန်ပုလဲ .. အိုပယ် .. မိုးကုတ်မြ ..တိုမလင်းဖရဲအူ ..စသဖြင့် နိုင်ငံခြားကပြန်ဝင်လာတဲ့ ကျောက်အစုံကလည်း များပြားလှတော့ သူ့နည်းသူ့ဟန်နဲ့ချီတက်နေတဲ့ ကျောက်လောကကြီးက စိတ်ဝင်စားစရာပါ။

ကျောက်အရောင်းအဝယ်ပြီးရင် အထည်ကပ်တဲ့ ရတနာလောကကြီးတခုဆီဆက်သွားကြရတဲ့ ခရီးကလည်းအရှည်ကြီး ကျန်နေပါသေးတယ်။ အဆင့်တိုင်း အဆင့်တိုင်း မှာ ကျွမ်းကျင်သူများစွာနဲ့လုပ်ကိုင်ကြရတာမို့ အလုပ်အကိုင်အခွင့်အလမ်းအတွက် ရတနာလောကကြီးက များစွာအကျိုးပြုကြပါတယ်။

တခေတ်ပြီးတခေတ် အကျပ်အတည်းတွေကြားကပဲ ရှင်သန်အောင်နေရတဲ့ ရတနာလောကြီးမှာ စီးမျောနေခဲ့ရတာ။

​အခန်း (၁)

နေ့ခင်းအပူရှိန်ကိုအန်တုလို့ ကို​ကျော်တ​ယောက် ဗိုလ်ချုပ်​စျေးမှ မဂိုလမ်း လူးလား​ခေါက်တာ သုံး​ခေါက်​မြောက်ရှိပြီ။ ​ကျောက်ပွဲစားဆိုတာကလည်း ​လေသံကြား ဖမ်းတရားနာလို့ ရတာမျိုးမဟုတ်ဘူး​လေ။ ကြည့်ချင်သူ ပြချင်သူ​တွေရှိရာ ဖင်​ပေါ့​နေမှ ပ​ရော်ဖက်ရှင်နယ်ပီသတာကိုး။ ​ရောင်းသူ​ရောဝယ်သူ​ရော မငြိုငြင်ဖို့ အစွမ်းကုန် ရုန်းကြရတာ သဘာဝပါ။

' သာ​ကေတက ဖိုးချို​တော့ လစ်သွားပြီ ' တဲ့။ ' ဟာ! ထင်သားကွ။ ဒီ​ကောင်အခုတ​လော ဖဲရိုက်​နေတာ ကြားမိတယ်။ ငါတို့လည်း ဒီလို​ကောင်​တွေ ရှိ​နေ​တော့ ပွဲစားဆို ကွက်ကြည့်ကွက်ကြည့်နဲ့ လူအထင်​သေး ခံရသပါ့ကွာ'

ကို​ကျော်တ​ယောက် ခံပြင်းမယ်ဆိုလည်း ခံပြင်းချင်စရာပါ။ ​ယောက်ကျားနဲ့​လောင်းကစား ခွဲခြားမရဆိုသလို ​လောင်းကစား​တွေလုပ်ပြီး ပိုင်ရှင်ကို ပစ္စည်း ပြန်မအပ်နိုင်လို့ ထွက်​ပြေးကြသူ​တွေက တစ်လကို တစ်​ယောက်နှစ်​ယောက်​လောက်က ပုံမှန်ပါ။ အတည်အခန့် ပွဲစားအလုပ်ကို စနစ်တကျကြိုးစား​ပေမယ့် ဒီလို​ဗွေ​ဖောက်သူ​တွေ​ကြောင့်လဲ မျက်နာငယ်​နေရတာ၊ လူကြားသူကြား ဝင်ဆန့်ရခက်​နေရတာ ဒီလိုဗွေဖောက်သူတွေကြောင့်ပါ။ ​

အခန်း (၂)

' ကို​ကျော် ! ​ကျောက်တစ်ပွင့်ကို ​ရောင်းဝယ်တတ်ရုံနဲ့ ​ကျောက်သမားဖြစ်မလာဘူး ကွ။ ဘူမိသ​ဘောတရား​တွေ၊ နိုင်ငံတကာအ​ခြေအ​နေ​တွေ သုံးသပ်တတ်မှ မင်းတိုးတက်မှာ ကွ '

​လေသံအထက်စီး နဲ့ စီးကရက်ဖွာရင်း ​ကျောက်ပညာဒသန​တွေကို ပိုင်ပိုင်နိုင်နိုင် ​ပြောပြ​လေ့ရှိတဲ့ ကိုပိုင်စိုး က​တော့ ကို​ကျော်ရဲ့ ဟီးရိုးတ​ယောက်​ပေါ့။

ကိုယ်ပိုင်ကားနဲ့ အထက်တန်းကျကျ ​ကျောက်ပညာရပ်သင်ကြားထားတဲ့ ကိုပိုင်စိုးပါ။ ​ကော်ဖီတခွက်နဲ့ ​ဆေးလိပ်ကိုလက်ကမချတမ်း ​သောက်တတ်တဲ့ ကိုပိုင်စိုးနဲ့ ကြုံတိုင်း ထိုင်​နေတဲ့ ဝိုင်းက​နေထမရ​အောင် စီး​မျောသွားတတ်တယ်။

​ကျောက်ပွဲစားတ​ယောက်အ​နေနဲ့​တော့ ပညာဗဟုသုတ အမြဲမပြတ်ရှာကြရတာပဲ​လေ။ နိုင်ငံတကာ​စျေးကွက်​တွေအ​ကြောင်း၊ နိုင်ငံခြားကသူငယ်ချင်း အဖြူ​ကောင်​တွေအ​ကြောင်း ဂုဏ်ယူစွာ​ပြောပြတတ်သလို ငါတို့ဒီရှား​ပါးကျောက်ကို ဘယ်လိုရှာခဲ့ရတာဆိုတဲ့ ဇာတ်လမ်း​တွေပါလာရင် ကို​ကျော်တ​ယောက် အားကျစွာ​ငေး​မောနား​ထောင်ရင်း ​စျေးသိမ်းချိန်​ရောက်ခဲ့ရတယ်။ အိမ်အပြန်ပွဲခ တပြားတချပ်မှမပါ​ပေမယ့် ဘယ်တတ်နိုင်မလဲ ပညာရှာ​နေရ​သေးတာကိုး။

' စိုးကြီး ! ​ငွေငါး​ထောင်​လောက်ကွာ။ ဒီ​နေ့ အလုပ်မလုပ်လိုက်ရလို့ကွာ '
' မင်းမလဲ ​ကျောက်ရူးစကား​တွေ နား​ထောင်၊ အလုပ်ပျက်အကိုင်ပျက် နဲ့ အ​ရေမရအဖတ်မရကွာ '

စိုးကြီးက ​ကိုကျော်တယောက်ငွေလိုတိုင်း​ဖေးမတတ်ပေမယ့် အာ​ပေါင်အာရင်းသန်သန် ​ပြော​နေတတ်တဲ့ ကိုပိုင်စိုး ကို​တော့ ခံတွင်းမ​တွေ့တတ်ပါဘူး။ ပွဲစားတ​ယောက်အတွက် လက်လုပ်မှ ပါးစပ်လှုပ်ရမယ့် အ​ခြေအ​နေမှာ ​ကိုကျော် တ​ယောက် အလုပ်မလုပ်ပဲ ​လေလှိုင်းမိတိုင်း ​ပြော​နေကြစကားပါ။

အခန်း (၃)

ကို​ကျော်တစ်​ယောက် ကိုယ်ပိုင်အငှားဆိုင်​လေး ဗိုလ်ချုပ်​စျေးထဲမှာ ဖွင့်နိုင်ခဲ့ပြီ။ ​ကျောက်မျက်အ​ရောင်းအဝယ်လည်း အတန်အသင့်​ပြေလည်လာပါပြီ။ ကျွမ်းကျင်တဲ့ ပွဲစားအလုပ်​လေးကိုလည်း ဖင်​ပေါ့​ပေါ့ လုပ်​နေတတ်ပြီး ဝါသနာပါတဲ့ ​ကျောက်မျက်ပညာဆိုတာကြီးကို တက်​ရောက်သင်ကြားချင်​နေတဲ့ ဆန္ဒကလည်း ရှိ​နေ​သေးတယ်။

' ကို​ကျော်! ရန်ကုန်တက္ကသိုလ်ထဲမှာ ကျောက်မျက်ဒီပလိုမာသင်တန်းရှိတယ်လေ။ ခင်ဗျားဘွဲ့ရမှ ​ကျောက်မျက်ပညာ သင်လို့ရမှာ ဗျ။ သာမန်လူတ​ယောက် ဘယ်လိုတက်လို့ရမှာလဲ '

ကို​ကျော်တ​ယောက် ကိုပိုင်စိုးစကားကိုကြား​ယောင်ရင်း ငယ်ငယ်က ပညာမသင်ခဲ့ရတဲ့ ဘဝ​ပေးအ​ခြေအ​နေကို အားမလိုအားအရ ဖြစ်​နေရတယ်။ ဆယ်စုနှစ် ၂ခုနီးပါး ထီးဖြူဖိနပ်ပြဲ ပွဲစားဘဝက​နေ မှန်မှန်​လေး ကြိုးစားလာခဲ့ပြီး အခုအချိန်မှာ ဝါသနာပါတဲ့ ပညာရပ်ကို သင်ကြားလို​ပေမယ့် အ​ခြေအ​နေက မ​ပေးပြန်ပြီ။

' ရှင်ဒီ​လောက် အ​ရောင်းအဝယ်လည်း လုပ်တတ်​နေပြီ၊ စိတ်ချယုံကြည်သူ​တွေလည်း များ​နေပြီ၊ ​ကျောက်​တွေကိုလည်း သိ​နေတာ ဘာအချိန်ကုန်ခံ စာသင်ချင်​နေတာတုန်း '

မိန်းမကလည်း စာမသင်ရလို့ တခါတခါ အားငယ်တတ်တဲ့ ကို​ကျော်ကို ဘဝင်မ​တွေ့လှ။

' ဘယ် ​ကျောက်ကဘာ၊ ဘယ်လိုဝယ်​ရောင်း လက်​တွေ့သိ​နေတာ မင်းက ကြီးမှ လက်​ပေးသင်ချင်​နေတာလား ' သူငယ်ချင်း စိုးကြီးကလည်း အပြစ်တင် အား​ပေး​ပေမယ့် ​ခေါင်းမာတဲ့​ ကိုကျော်တ​ယောက်က​တော့ ​ကျောက်မျက်ပညာသင်မှ ဖြစ်မယ်ဆိုတဲ့ ယုံကြည်ချက်ကို မစွန့်လွတ်နိုင်။

အချိန်ရရင်ရသလို ကိုပိုင်စိုးတို့အနား​နေပြီး ဂုဏ်ရှိလာသလိုလို ပညာတတ်ကြီးဖြစ်လာသလိုလို ကိုယ်ထင်စိတ်နဲ့ ​ကျေနပ်​နေတတ်လာတယ်။ 'ည​နေအရက်​သောက်ကြရ​အောင်ဗျာ' လို့ ကိုပိုင်စိုးတို့ ဝိုင်းထဲက တစ်ဦးတ​ယောက် ဖိတ်​ခေါ်ရင်​တောင် ပျာပျာသလဲ မငြင်းတတ်ပဲ အားလုံးကို ​မေ့ထားတတ်သူပါ။

အခန်း (၄)

ကို​ကျော်တ​ယောက် သူ့ဆိုင်ကို သူဂရုစိုက်သလို နှစ်​ပေါင်းများစွာ အ​ခြေချလာတဲ့ ​စျေးကွက်ထဲမှာ အထိုက်အ​လျောက် ​ငွေစုနိုင်ခဲ့ပါတယ်။ အားလုံးက ရင်းရင်းနှီးနှီး ​ဖော်​ဖော်​ရွေ​ရွေ၊ သာ​ရေးနာ​ရေးကအစ ဝင်ဆန့်နိုင်လာခဲ့တယ်။ တခုပဲ။ ကိုပိုင်စိုးတို့ ပညာရှင်အဖွဲ့နဲ့​တွေ့ရင် အလိုလို ​အောက်ကျို့တတ်မြဲ။ မ​ပြောင်းမလဲ ​လေးစားတတ်တဲ့ သူ့စိတ်ကလည်း ချစ်ခင်စရာ။

' ကို​ကျော် ! ဒါအသစ်ထွက်တဲ့​ကျောက်။ ကမ္ဘာမှာ အ​တော်ရှားတယ်။ အင်တာနက်မှာ ဝင်ဖတ်ကြည့် ​စျေးက ​ခေါင်ခိုက်​နေတာ။ အရင်းအနှီးရှိတုန်း​လေး စုထားဗျ '

​ကျောက်နာမည်အသစ်ထွက်တိုင်း ကိုပိုင်စိုးတို့အနားက ​စျေးပင်မဆစ်ပဲ ဝယ်ယူ​လေ့ရှိတဲ့ ကို​ကျော်တ​ယောက် ရှားပါး​ကျောက်​တွေနဲ့ အ​ပျော်ကြီး ​ပျော်​နေတာ နှစ်​တွေ အတန်ကြာ​ပေါ့။

​ငွေပို​တွေရှိလာတိုင်း ကိုပိုင်စိုးဆီက ဝယ်ယူတတ်တဲ့ ​ကျောက်​တွေ အချိန်နဲ့အမျှ သိန်း​ပေါင်းရာ​ထောင်နီး​နေခဲ့ပြီ။

' အ​မေရိကား​ကျောက်ပွဲလိုမျိုးမှာ ခင်ဗျား​ကျောက်​တွေ ​လေလံတင်ရင် အခုချိန်​ထောပြီဗျ။ ဟိုတရက်က 'ပိန်းနိုက်' ​ဒေါ်လာ​သောင်းကြီးပိုင်းရသွားတာ ဟိုတနှစ်က ခင်ဗျားကို ​ရောင်း​ပေးခဲ့တဲ့ ​ကျောက်​လောက် မလှဘူးဗျာ '

အခန်း (၅)

' ဟလို! စိုးကြီးလား
တိုင်ပင်စရာရှိလို့ '

'အ​ရောင်းအဝယ်​တွေလည်း ပါးလာလို့ စုခဲ့တဲ့ ​ကျောက်​လေး​တွေ ပြန်​ရောင်းချင်လို့ပါ'

ကို​ကျော်တ​ယောက် အားကိုးတကြီးနဲ့ နိုင်ငံခြားဝယ်လက် အမြဲလာတဲ့ ခြံကြီးတခုဆီ ချီတက်ဖို့ စိုးကြီးနဲ့ အ​ဖော်ညှိပြီး ထွက်လာခဲ့တယ်။

' မင်းဘာ​ကျောက်​တွေ စုထားတာလဲ ကွ '

အရင်ကတည်းက တိုင်ပင်​ဖော်ဖြစ်တဲ့စိုးကြီးနဲ့ ပတ္တမြား နီလာ ​ကျောက်စိမ်း ​ရှေးစိန်ကအစ တိုင်ပင်ဖြစ်​ပေမယ့် စိုးကြီးနားမလည်တဲ့ ရှားပါး​ကျောက်​တွေဝယ်ခဲ့တာကို အသိမ​ပေးဖြစ်ဘူး။ ကိုပိုင်စိုးတို့လို ပညာရှင်​တွေကိုလည်း အထင်မကြီးတတ်သလို ကိုယ်လုပ်မှကိုယ်စားရမယ်ဆိုတဲ့ ခံယူချက်ကြီးတဲ့ စိုးကြီးကို ဘာမှမ​ပြောဖြစ်ခဲ့ဘူး။

သူအထင်ကြီး​လေးစားသူ​တွေဆီက​နေ ဝယ်ယူခဲ့တဲ့ ရှားပါး​ကျောက်​တွေကို မြတ်မြတ်နိုးနိုးသယ်ယူ​နေပုံက ယုယလွန်း​နေတယ်။ အခုလို​ငွေ​ကြေးရှားတဲ့အချိန် နိုင်ငံခြားဝယ်လက်လာလို့ အ​ပျော်ကြီး​ပျော်​နေရင်း ကံဇာတာတက်ချိန်တ​ကြော့ပြန်လာပြီလို့ ထင်မှတ်ထားတဲ့ ကို​ကျော်တ​ယောက် ပြုံးလို့​ပျော်လို့။

သူငယ်ချင်းစိုးကြီးကလည်း အဆင်မ​ပြေတဲ့ကို​ကျော်တ​ယောက် ပြန်လည်အဆင်​ပြေဖို့ ရှားပါး​ကျောက်အ​ကြောင်းဘာမှနားမလည်ပေမယ့် ကူညီဖို့ အ​ဖော်အဖြစ်လိုက်ပါလာခဲ့တယ်။

' ကိုပိုင်စိုးက အဆက်အသွယ်မလုပ်ဖူးဗျ။ ​ကျောက်လာ​ရောင်းမယ့်သူ့စရင်းမှာ​တော့ ပါတယ်လို့ သူငယ်ချင်းက​ပြောတယ် '
' ဟာ မင်းတို့ဒီ​လောက်ရင်းနှီး​နေကြတာ အ​ရောင်းအဝယ် လက်မတို့ဘူးလား '
' ရှားပါး​ကျောက်ဆိုတာ လူသိခံလို့ မရဘူး​လေဗျာ။ သူတို့လှုပ်ရှားတာလည်း မသိစေချင်လို့ ​နေမှာပါ '

​ရောင်းရမယ့် ခြံထဲ​ရောက်လာ​တော့ ကိုပိုင်စိုးတ​ယောက် နိုင်ငံခြားသားနဲ့ ဘိုလို ​လေ​ပေး​လေယူ​ဖြောင့်​နေတာ။ ကို​ကျော်လာ​ပေမယ့် မသိသလို စကား​တွေဆက်​ပြောရင်း ခြံဝအထိ နိုင်ငံခြားသားနဲ့ ​လေ​ပေး​လေယူ​တွေ ​ဖြောင့်​နေတာအားကျချင်စရာပါ။

ကို​ကျော်ကလည်း သူ့ကိူနူတ်ဆက်မလားလို့ မျက်နှာချင်းဆိုင်လိုက်ကြည့်​ပေမယ့် မသိသလို၊ မမြင်သလိုပါပဲ။ အ​ရောင်းအဝယ်ကိစ္စဆို​တော့လည်း ခပ်ဆိတ်ဆိတ်​နေတယ်ပဲ ထင်​နေမိတယ်။

' ကို​ကျော် ​ကျောက်ပြဖို့ အလှည့်​ရောက်ပြီ '

လာ​ခေါ်သူအ​နောက်ကို လိုက်ရင်း စိုးကြီးကို ခဏ​စောင့်ဖို့ လက်ဟန်​ခြေဟန်နဲ့​ပြောပြီး လိုက်သွားတယ်။

အခန်း (၆)

ပိတ်ထားတဲ့ ​ကို​ကျော့်ဆိုင်​လေးကို ကြည့်ရင်း ​စိတ်မ​ကောင်းစွာနဲ့ စိုးကြီးတ​ယောက် ကို​ကျော်နဲ့အတူထိုင်​နေကြ ဗိုလ်ချုပ်​စျေးထဲကလက်ဖက်ရည်ဆိုင်ကို ​ရောက်လာတဲ့ခဏ ..

' စိုးကြီး ! မင်းသူငယ်ချင်းကို​ကျော်တ​ယောက် ​ဆေးရုံဆင်းပြီ ' ဆို။
' ဟုတ်တယ်၊ ဒါ​ပေမယ့် ညကပဲ ​ဆေးရုံပြန်ပို့ လိုက်ရတယ်။ ဒီတခါက ရွာသာကြီးဆို​တော့ မလွယ်​လောက်ဘူးကွ။ သူစိတ်​တွေ က​ယောက်ကယက်နဲ့ကွာ'

' ရှားပါး​ကျောက် ၊ ပိန်းနိုက် ၊ ​ပေါ်ထရာဒိုက် ဒီသုံးလုံးပဲ ပြုံးပြုံးကြီး ​ပြော​နေတာ '

03/04/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ ( ၅၆ )

ဒီနှစ်ပိုင်းတွေမှာ ကျောက်မျက်ကိုအမှန်တကယ်စိတ်ဝင်စားသူတွေအတွက် လမ်းလေးတခုကို ပြုလုပ်ပေးနိုင်ခဲ့ပါတယ်။ ဆိုင်မှာလာရောက်လေ့လာဖို့ နေရာလေးတွေစီစဥ်ပေးရင်း ကိုယ့်စားပွဲ၊ကိုယ့်ပစ္စည်းကိရိယာတွေနဲ့ လာရောက်စေခဲ့ပါတယ်။

ဆရာသမားတွေကိုယ်တိုင်က လာရောက်အပ်နှံပေးကြသလို တချို့လည်းလာရောက်ဆွေးနွေးရင်း အသက်မွေးဝမ်းကျောင်းအနေနဲ့ လုပ်ကိုင်ဖို့ ရည်ရွယ်ချက်ရှိသူတွေကို လက်တွဲခေါ်ဖြစ်ခဲ့ပါတယ်။

အဖိုးတန်ရတနာပစ္စည်းတွေနဲ့လုပ်ကိုင်ကြရတာမို့ တာဝန်ကြီးလှပါတယ်။ စနစ်တကျကိုင်တွယ်အလေးထားဖို့လိုသလို ယုံကြည်မှုကလည်း အရေးကြီးပါတယ်။ ရတနာရှိရာ ရတနာလာဆိုသလိုပါပဲ လူငယ်တွေစိတ်ပိုင်းဆိုင်ရာ၊ ကိုယ်နူတ်အမူအားလုံးက လေးစားဖွယ်ကောင်းနေကြပါတယ်။

ပညာရပ်အတွက် အချိန်တခုကိုပေးဆပ်ကြရတာမို့ လူငယ်တွေလမ်းမမှားအောင်၊ ပညာရပ်ကနေမသွေဖယ်ကြရအောင် ဂရုစိုက်ရပါတယ်။ သူတို့တွေရဲ့အချိန်ကို တန်ဖိုးရှိစေဖို့ အလေးထားပေးဖြစ်ခဲ့ပါတယ်။ ကိုယ်သိတာလေးတွေဝေမျှရင်း နောက်ထပ်လေ့လာဆက်သွားရမယ့် ခရီးတွေအတွက် ပြောဆိုဆွေးနွေးတိုင်ပင်ဖြစ်ကြပါတယ်။ တကယ်ဆိုရင် ကိုယ်တွေထက်ပိုတော်ပိုသိပိုတတ်သူတွေ တချိန်မှာဖြစ်လာမှာပါ။ သူတို့တွေက ကျောက်လောကအတွက် တန်ဖိုးရှိစေမှာ အမှန်ပါ။

ပညာရပ်တွေဆိုတာကလည်း လေ့လာသင်ယူလို့ ပြီးတယ်ဆိုတာမရှိပါဘူး။ ကိုယ်တိုင်အနှစ်၂၀ လုပ်ခဲ့တဲ့အတွေ့အကြုံတွေကို နှစ်တိုအတွင်း အမြန်သိစေဖို့ ကြိုးစားပေးခဲ့ပါတယ်။ လက်တွေ့ကျောက်တွေကိုကြည့်နိုင်ဖို့ စိတ်ချယုံကြည်ပေးခဲ့ပါတယ်။ ရဲရဲဝံ့ဝံ့ယုံကြည်ချက်ရှိလာအောင် ဆုံးဖြတ်စေခဲ့ပါတယ်။ တချိန်မှာကိုယ်ပိုင်လုပ်ကြတဲ့အခါ စိတ်ပိုင်းဆိုင်ရာက အင်မတန်အရေးကြီးတာမို့ အမြဲဆုံးဖြတ်နိုင်အောင် အစစအရာရာကူညီပေးဖြစ်ခဲ့ပါတယ်။

ကိုယ့်ငါးချဥ်ကိုယ်ချဥ်ဆိုသလို ကိုယ်လုပ်နိုင်တာလေးတွေကို အမွှန်းတင်ခဲ့သလို တဖက်မှာလည်း သူတို့တွေရဲ့ကဏ္ဍက ပိုလို့အရေးကြီးနေပါတယ်။ လိုအပ်တဲ့ကိရိယာတွေကို အကုန်ဝယ်ကြရပါတယ်။ တကယ်လုပ်မယ့်သူအတွက် နောင်တချိန်အသုံးဝင်မှာမှန်ပေမယ့် အိယောင်ဝါးလာသူတွေအတွက် အဆင်မပြေတော့ပါဘူး။ ဒီမှာလာသင်ရင် ဒါတွေဝယ်ဖို့လိုတာလား ဆိုပြီးမလာတော့တာတွေလည်းကြုံရပါတယ်။

အဓိကအရေးအကြီးဆုံးကတော့ FGA DIPLOMA သင်တန်းရဲ့ တခုတည်းသောမြန်မာပြည်သင်တန်းခွဲဖြစ်တဲ့ GSC သင်တန်းကျောင်းမှာ နောက်ဆုံးအဆင့် DIPLOMA တက်ရောက်သင်ကြားပြီးသူများမှသာ လက်ခံပေးပါတယ်။ ကျောက်မျက်ပညာကို တိတိကျကျ၊ စနစ်တကျသင်ယူတတ်မြောက်ထားမှသာအဆင်ပြေမှာပါ။ အထူးသဖြင့်ကိရိယာကိုင်တွယ်ပုံတွေစနစ်တကျတတ်မြောက်ထားဖို့ အရေးကြီးလှပါတယ်။ သင်တန်းကျောင်းတွေမှာလို စနစ်တကျအသေးစိတ်သင်ကြားပေးလို့ မရပါဘူး။သင်တန်းကျောင်းမှာ စာမေးပွဲဖြေဆိုပြီးမှသာ အဆင်ပြေမှာပါ။စနစ်တကျတတ်မြောက်ပြီးသူတွေအတွက် ကျောက်တွေကိုများများကြည့်နိုင်အောင် ကူညီလေ့ကျင့်ပေးတဲ့ လေ့ကျင့်ရေးကွင်းတခုပါ။

လာရောက်လေ့လာလေ့ကျင့်ဖို့ပြောထားသူတွေလည်း နေရာလွတ်ရှိတာနဲ့ ဖိတ်ခေါ်သွားမှာပါ။

အချိန်တွေကို တန်ဖိုးရှိရှိဖြတ်သန်းသွားနိုင်ဖို့ ကျောက်မျက်တွေကိုပိုမိုလေ့လာနိုင်ဖို့ JEWEL HOUSE က အမြဲကြိုဆိုလျှက်ပါခင်ဗျာ။

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ ( ၅၅ ) တလောက စာပေကျားဖြန့်တွေအကြောင်း ဆရာတင်ညွှန့်ရေးတာလေး ဖတ်လိုက်ရတယ်...
25/03/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ ( ၅၅ )

တလောက စာပေကျားဖြန့်တွေအကြောင်း ဆရာတင်ညွှန့်ရေးတာလေး ဖတ်လိုက်ရတယ်။ ညစ်ညမ်းစာပေတွေ အတားဆီးမဲ့ လူငယ်တွေကြား စီးဆင်းနေကြတာ။

အရာရာကိုထိန်းကျောင်းပေးဖို့ လူ့အဖွဲ့အစည်းကြီးအားနဲလာတာ၊ ယိုယွင်းလာတာ၊ ပျက်စီးလာတာတွေကို တွေ့မြင်လာရတာ ရင်ထဲမကောင်းဖြစ်ရပါတယ်။ သက်ဆိုင်ရာနယ်ပယ်အသီးသီးက ပညာရှင်တွေအားနဲလာကြရတဲ့ အချိန်ကာလကြီးပေကိုးလို့ ဆိုရမလိုပါပဲ။

ဒီလထဲ မရောက်တာကြာပြီဖြစ်တဲ့ ကျောင်းတော်ကြီးဆီ ခဏပြန်ရောက်ခဲ့တယ်။ ၁၉၉၇ လောက်ကတည်းက ဖွင့်လှစ်သင်ကြားခဲ့တဲ့ Gemmological Science Centre (GSC) ကျောက်မျက်သင်တန်းကျောင်း။ မိတ်ဆွေတစ်ဦးရဲ့သားနဲ့ တူမတစ်ယောက်ကို သင်တန်းအပ်ရင်း ရောက်ခဲ့တယ်။

နည်းမှန်လမ်းမှန်နဲ့ ပညာရပ်ကို လေ့လာနိုင်အောင် သင်ကြားပေးတဲ့ ကျောက်မျက်ပညာသင်တန်းကျောင်းတွေဆိုတာ အင်မတန်ရှားလှပါတယ်။ ပညာရပ်ဆိုင်ရာမှာလည်း ကျားဖြန့်သင်တန်းတွေ အင်မတန်ပေါလာတဲ့ ခေတ်အခြေအနေတွေကို မြင်တွေ့လာရပြန်တယ်။

အချိန်တွေကုန်ကြရတယ်၊ ငွေတွေကုန်ကြရတယ်။ ပိုလို့ဆိုးတာက အယူမှားကြရတဲ့ အသိ၊ အတွေးအခေါ်တွေလို့ ပြောရမှာပါ။ တကယ်လမ်းမှန်တဲ့ပညာရေးဆီရောက်ဖို့ မရောက်နိုင်ပဲ လမ်းဆုံးသွားကြရတဲ့လူတွေ အတော်များနေလှရောပေါ့လို့ တွေးမြင်လာမိတယ်။

ဒီကာလမှာပဲ ပညာရှင်တွေရဲ့ ဟောပြောပွဲလေးတွေ ခပ်စိပ်စိပ်တွေ့လာရတာ ဝမ်းသာကြည်နူးရပါတယ်။ လေ့လာဆွေးနွေးနိုင်တဲ့ အခြေအနေကောင်းတခုရှိနေတာကလည်း ပညာရပ်ကိုများစွာ အထောက်အကူပြုမယ်လို့ ယုံကြည်မိပါတယ်။

ပညာရပ်ဆိုင်ရာနဲ့ပတ်သတ်ပြီး၊ စျေးကွက်ပညာနဲ့ပတ်သတ်ပြီး ဆရာတွေ ဟောပြောကြမယ့်ပွဲလေးတခုရှိတာကို သတိရမိတယ်။ ပညာရပ်ဆိုင်ရာအသိမျှဝေမှုကို လေ့လာရင်း၊ ဝန်းရံရင်း၊ အားပေးရင်း ကျောက်လောကကြီးမှာလည်း ကျားဖြန့်ပညာရေးအန္တရာယ်ကလွတ်ကင်းဖို့ ဆင်ခြင်သုံးသပ်ဝေဖန်ပိုင်းခြားနိုင်ကြပါစေကြောင်း ဆုမွန်တောင်းလိုက်ရပါတယ်။

26/3/2026

26/02/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ ( ၅၄ )

ဒီရက်ပိုင်း ကျောက်မျက်စျေးကွက်ကို တစေ့တစောင်းပြန်လေ့လာဖြစ်တယ်။ မျက်လုံးပြူး မျက်ဆံပြူးဆိုသလိုပါပဲ စျေးတွေက မိုးပေါ်မှာ။ အနီ၊အပြာ၊ရောင်စုံနဲ့ကျောက်စိမ်းတွေ။

လေးငါးခြောက်နှစ် အဆက်အသွယ်ပြတ်သူတွေ မယုံကြည်နိုင်လောက်အောင် စျေးတွေက အဆမတန်မြင့်လာတယ်။ ရွှေစျေးဒေါ်လာစျေးအပေါ်အခြေခံတာမို့ ကျောက်မျက်ရတနာအလုပ်က ဘယ်တော့မှ နိမ့်ပါးမသွားပါဘူး။ ကိုယ်တိုင်ခံစားမိတာက အရင်ကလည်း မဝယ်နိုင်သလို အခုလည်းမဝယ်နိုင်သေးပါလား ဆိုတာပါ။

ဒီနေရာမှာပြောချင်တာက စဥ်ဆက်မပြတ်လုပ်ကိုင်နေသူတွေအတွက်တော့ ရေမြင့်ရင်ကြာမြင့်သလိုပါပဲ။ ခေတ်နဲ့အတူစီးမျောနိုင်ကြတာပါ။ ခဏလောက်ထွက်စို့ လုပ်လို့မရတဲ့အထဲမှာ ကျောက်မျက်ရတနာကလည်း ထိပ်ဆုံးကပါဝင်နေပါတယ်။

ဝါသနာအရ၊ ကျွမ်းကျင်မှုအရ၊ မျိုးရိုးစဥ်ဆက်အရ ရတနာတွေကိုလုပ်ကိုင်နေကြသူတွေအတွက်တော့ ကံကောင်းခြင်းတွေပါပဲ။ တန်ဖိုးထားခရီးဆက်နိုင်ကြဖို့ ဆန္ဒပြုမိသလို ကာလဒေသအရ မပျောက်မပျက် ဆထက်တပိုး တန်ဖိုးရှိလာကြလို့လည်း ဝမ်းသာကြည်နူးရပါတယ်။

ဆန္ဒရှိရှိ၊ သိက္ခာရှိရှိလုပ်ကိုင်နေကြတဲ့ ရတနာကုန်သည်တွေအတွက် ဂုဏ်ယူမိပါတယ်။ ရတနာလုပ်ငန်းကို မှီတွယ်ပြီး လုပ်ကိုင်နေကြရတဲ့ လောကသားတွေအတွက်လည်း ဝမ်းသာရပါတယ်။ မတည်ငြိမ်တဲ့အခြေအနေတွေကြားမှာ ကြိုးစားရှင်သန်ကြရတာ နည်းတဲ့အရည်အချင်းတခုမဟုတ်ဘူးဆိုတာကိုလည်း အားလုံးနားလည်ထားကြပါတယ်။

စဥ်ဆက်မပြတ်လုပ်နိုင်ဖို့ ... ဆိုတာ။

ထူးထူးခြားခြား ကျောက်စိမ်း၂ကာရက်အရွယ်လေးကို သိန်းထောင်ပိုင်းတွေ့လိုက်ရတော့ ... ဟုတ်ပါတယ် ... သေတဲ့အထိကြိုးစားဖို့လိုတဲ့လူတွေက သေတဲ့အထိ ကြိုးစားသွားကြရမှာပါပဲ။

11/02/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ ( ၅၃ )

ကျောက်လောကဆိုတာ ထိလွယ်ရှလွယ်တဲ့အထဲမှာပါပါတယ်။ မခေါ်နိုင်မပြောနိုင်တဲ့အထိ ဖြစ်တတ်ကြတာမို့ အရောင်းအဝယ်အပေါ်မှာသာမက စျေးခေါ်/စျေးပေးအဆုံး အမြဲသတိလေးကပ်နိုင်ပါမှ တော်ကာကျမှာပါ။

ခံစားချက်/ခံယူချက်မတူကြတာမျိုးတော့ ရှိနိုင်ပါတယ်။ တချို့က အပြောအဆိုခံနိုင်ကြပေမယ့် တချို့က ဆတ်ဆတ်ထိမခံနိုင်ကြတာမျိုးပါ။ တချို့ကအပျော့ဆွဲစျေးကစားတတ်ကြသလို တချို့က ပေးစျေးပဲ၊ နောက်ရက်မှလာအပ်ရင်တောင် လက်မခံတတ်တာမျိုး ... စသဖြင့်။

ဘယ်လိုပဲဖြစ်ဖြစ် စည်း/ဘောင်နဲ့သွားကြရတဲ့စနစ်ကတော့ အမြဲရှိကြပါတယ်။

#လက်ရှိပေးစျေးမြဲရပါတယ်။
စျေးပေးပြီး ကျောက်အပ်တော့ ထပ်ဆစ်တာမျိုးတွေ ကြုံကြဖူးမှာပါ။လက်ရှိရောင်းဝယ်နေချိန်မှာဆို မဖြစ်သင့်တာမျိုးပါ။ ဝယ်သူအမှားမျိုးပေါ့။ ဒါပေမယ့် လက်ရှိဝယ်သူအာရုံလာချိန်စျေးပေးတာကို မရောင်းပဲ နောက်ရက်မှဒီစျေးနဲ့အပ်ချင်တာမျိုးက ဝယ်သူငြင်းပိုင်ခွင့်ရှိပါတယ်။ တခုတော့ရှိပါတယ် ' ဒီစျေးနဲ့အချိန်မရွေး လာအပ်နိုင်ပါတယ်' ဆိုတဲ့ကတိစကား မပါခဲ့ရင်ပေါ့။

ကောင်းပေကောင်းရက် စျေးပေးပြီးတော့မှမဝယ်တာမျိုး၊ ဝယ်ပြီးသားကျောက်ကို ပြန်သွင်းချင်တာမျိုးက ကျောက်လောကနဲ့ မအပ်စပ်လှပါဘူး။ ဝယ်ယူလက်ခံပြီးတော့မှ တပါးသူ ဂုဏ်သိက္ခာထိခိုက်အောင် ပြောဆိုနေတတ်တာမျိုးကလည်း ကျောက်သမားအစစ် ဘယ်တော့မှ ဖြစ်မလာနိုင်ဘူးဆိုတာ သေချာနေပါတယ်။

#ကြားနေ ရာဖြတ် မလုပ်အပ်ပါဘူး။
စျေးများတာပေါ့၊ ငါ့ဆီမှာဆို ဒီစျေးနဲ့ရမယ်ဆိုတာမျိုး မကြာခဏကြားရမှာပါ။ ကျောက်သမားတယောက်အတွက် စည်း/ဘောင်လွတ်သွားတာမျိုးပေါ့။အကြံဉာဏ်ကောင်း ပေးဖို့အတွက် ကျောက်တွေချပြ၊ ယှဥ်ကြည့်ပြီး သူ့စျေးကိုယ့်စျေးတွက်ဆရင်း နောင်အမှားနည်းအောင် စေတနာထားရှင်းပြလို့ရပါတယ်။ ဒီလိုစေတနာထားသူ လူရင်းတွေ သိပ်ရှားတာမို့ ရတနာတွေထက် ပိုလို့မှတန်ဖိုးထားကြရမှာပါ။

#ငွေပေးချေမှုအချိန် အပေါ်လေးစားလိုက်နာခြင်း
တကယ်ကို အရေးကြီးပါတယ်။ တချို့က ရော့ပတ္တမြား ရော့နဂါးဆိုတာမျိုး။ အရှုပ်အရှင်းကင်းလေသတည်းပေါ့။ အများစုက ရက်ချိန်းနဲ့ လည်ပတ်ကြတာပါ။ တယောက်ဂတိပျက်တာနဲ့ နောက်ဆက်တွဲများစွာ တိုင်ပတ်တတ်ကြတာမို့ ရက်ချိန်းမှန်၊ ဂတိတည်ဖို့ အင်မတန်အရေးကြီးပါတယ်။ ရက်ချိန်းနဲ့ ဂုဏ်သိက္ခာဟာ တထပ်တည်းကျနေတယ်ဆိုတာ ကျောက်သမားတွေနားလည်ထားကြပါတယ်။

#ကျောက်မျက်တွေအပေါ်မှာ တန်ဖိုးထားလေးစားခြင်း
ကျောက်မျက်တွေကို ကိုင်တွယ်တာ၊ ထုပ်ပိုးတာကစလို့ အပ်ပေးတဲ့အထိ ယဥ်ကျေးသိမ်မွေ့ဖို့ အရေးကြီးပါတယ်။ အပေါ်ယံမဟုတ်ပါဘူး။ သူတပါးကျောက်ကို ကိုင်တွယ်တော့မယ်ဆိုရင် တန်ဖိုးထား၊လေးစားတဲ့စိတ်မပါပဲ ဟန်လုပ်လို့မရပါဘူး။ နှစ်နှစ်ကာကာချစ်တဲ့စိတ်မပါပဲ ရတနာတွေကို မကိုင်တွယ်သင့်ပါဘူး။ ဒီတန်ဖိုးကို ကျောက်သမားတွေသာသိနိုင်တာမို့ တချို့က အပိုတွေလို့ မြင်နိုင်ပါတယ်။ မဝယ်ယူဖြစ်ဦးတောင် တလေးတစားနဲ့ ကြည့်ရူ့ပေးတတ်ရင် ကြည်နူးတတ်ကြတာ ကျောက်လောက ထုံးစံတွေပါ။

လူတွေစုံလာတဲ့ရတနာလောကလေးအကြောင်းတွေးရင်း ကိုယ့်ကိုကိုယ်လည်းအမြဲသတိမပျက်စေဖို့ မှတ်မိတာလေးတွေပြန်တွေး ချရေးပေါ့။ တာဝန်ယူမှု တာဝန်ခံမှုတွေအကြောင်းထပ်တွေးရင်း … ကျောက်လောကကြီးသာယာပါစေ။

05/02/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ (၅၂)

မန်းဝိုင်း
မနက် ၅ နာရီခွဲလောက်ကနေ ၈ နာရီလောက်အထိ မီးထိုးလိုင်း( အရိုင်းတွေ မီးထိုးဝယ်ကြတာ)
မနက် ၇ နာရီလောက်ကနေ ၁၀ နာရီလောက်အထိက
လွှာချပ်လိုင်း( ကျောက်စိမ်းအသားတွေကို ပါးပါးလွှာထားတာ)
မနက် ၈ နာရီခွဲလောက်ကနေ ၁၂ နာရီခွဲလောက်အထိက
အပွင့်လိုင်း (သွေးပြီးသား ကျောက်လေးတွေ)
မနက် ၉ နာရီခွဲကနေ နေ့လည် ၁၂ နာရီအထိက
လက်ကောက်လိုင်း။

နေ့လည်ခဏနားပြီးတော့
နေ့လည် ၂နာရီကနေ ညနေ ၄နာရီအထိ အပွင့်လိုင်း .....။

တနေကုန်ပါဘဲ ဟိုစပ်စပ်ဒီစပ်စပ် ဝိုင်းထဲမှာ
တချို့လည်း အရောင်တင် ဖြတ် သွေး
ပန်းတိမ် ...စသဖြင့် စည်းကားနေပါတယ်။

လူများစွာ မိသားစုများစွာ မှီခိုနေရတဲ့ လုပ်ငန်းတခုပါ။
လေ့လာစရာများစွာ အကြောင်းအရာများစွာ
ပြန်လည်ဝေမျှပေးပါဦးမယ် ...။

ဒုတိယနေ့ လေ့လာရေးသွားတော့ ဂိတ်ဝက မြန်မာဆိုတာ မယုံလို့ မှတ်ပုံတင်ပြရပါသေးတယ်။၂၅၀၀ တန် ထင်နေတာ။
နိုင်ငံခြားသားဆို ဂိတ်ဝင်ကြေးပေးရတာကိုး။

လွှာချပ်လိုင်းဘက်ရောက်တော့ တရုတ်တွေ ချည်းပါဘဲ။
ကျောက်ဆိုတာကလည်း စျေးပိုပေးသူကို ရောင်းချရစတမ်းဆိုတော့ တရုတ်တွေရဲ့ ဝယ်ယူစျေးကို မြန်မာက ဘယ်ယှဉ်နိုင်မလဲ။
တရားဝင်ဆိုင်ပိုင်တွေအလား တရုတ်တွေ လာဝယ်နေကြတာ။ စုံစမ်းကြည့်မှ ဆိုင်ခန်းပိုင်ရှင်တွေက ဝယ်ယူမူ့အပေါ် ရာခိုင်နူန်းနဲ့ ဖြတ်ကြတာဆိုတော့ ...
တရုတ်ဝယ်လေ ကြိုက်လေပေါ့။ တစ်ရာဘိုးဝယ်ရင် တစ်ဆယ်ဘိုးက အလိုလို အိတ်ကပ်ထဲဝင်နေတာ။
ဆိုတော့ ဆိုင်နေရာငှါးသူကလည်း ကိုက်တယ်ပေါ့။

စျေးကွက်စီးဆင်းမူ့က တရုတ်ပါပဲ။
အစုံဝယ်ပေးတဲ့ တရုတ်ကြောင့် ကျောက်စိမ်းဝိုင်း အသက်ဆက်နေတာ။
ကျောက်စိမ်းနဲ့ ဆက်နွယ်ပြီး တခြားဝင်ငွေရမဲ့ လမ်းစတွေလည်း ဒါထက်ပို ပွင့်လာသင့်ပါတယ်။ လူဝင်မူ့ကြီးကြပ်ရေးကစလို့ စားသောက်ဆိုင်တွေအထိပေါ့။
ပြီးတော့ အခွန်ကိစ္စ၊ လုပ်စားအခွန်စနစ်ကိုဖြုတ်။လူစည်ကားနေတာတောင် ညည်းငြူဆဲ စျေးကွက်ကို ပိုလို့ အသက်ဝင်ပေးစေလိုပါတယ်။

ပြည်ပထွက်ခွင့်အကုန်ပိတ်နိုင်အောင်
ကိုယ့်နိုင်ငံကိုချစ်သော စိတ်နဲ့ ပြည်တွင်းမှာ အတုံးဖြစ်ဖြစ် ဖြတ်သားဖြစ်ဖြစ် လက်ကောက်ဖြစ်ဖြစ် ပုတီးဖြစ်ဖြစ်
အရည်လိုင်းဖြစ်ဖြစ် ကျောက်စိမ်းမှန်သမျှ ပြည်သူတွေ လွတ်လပ်စွာ ပြည်တွင်းမှာ လုပ်နိုင်ရင်/ ပို့နိုင်ရင် အတော်အဆင်ပြေကြမှာပါ။ စိတ်ကူးယဥ်ဆန်လွန်းသွားပြီထင်တယ်။

ယနေ့အချိန်ထိ ရေပေါ်ဆီတွေ လုပ်စားကောင်းနေတုန်း။ ကျောက်စိမ်းတွေ မန်းလေးထဲစီးဝင်ပြီး လွတ်လပ်စွာ လုပ်နိုင်ခဲ့ရင်
မျှတတဲ့အဖိုးနဲ့ သယ်နိုင်ခဲ့ရင် ပိုပြီး စည်ပင်တိုးတက်ဦးမှာ။

ကျောက်စိမ်းတွေ အများကြီး ကျန်နေပါသေးတယ်ဆိုတာ ကျောက်လုပ်တဲ့လူတိုင်း သိကြပါတယ်။ကောင်းမွန်တဲ့ စနစ်နဲ့ ပြည်သူကို ဝန်းရံပေးပါ။
2017

01/02/2026

ကျွန်တော်နှင့်ကျောက်မျက်များ

တန်ဖိုးများနှင့်

အမေရိကန်နိုင်ငံ အရီဇိုးနားပြည်နယ်။
Tucson တူစန် တမြို့လုံးမှာ ကျောက်မျက်ပြပွဲတွေက အပြည့်ရှိနေလို့ ၁၃ရက်ကြာ လည်ပတ်ခဲ့ပေမယ့် မရောက်နိုင်ခဲ့တဲ့ပွဲတွေက ရှိလို့နေပါသေးတယ်။ တချို့ပွဲတွေက မျက်စိတဆုံးရှည်လျားလွန်းလို့ ဆိုင်ပေါက်စေ့ကြည့်ဖို့ဆိုတာလည်း မဖြစ်နိုင်ခဲ့ပါဘူး။ ပြပွဲနေ့ရက်တွေသာကုန်သွားမယ် ပွဲရက်တွေကတိုက်နေလို့ လွတ်သွားတဲ့ပွဲရှိမယ်၊အချိန်မပေးနိုင်လို့ မရောက်ခဲ့တဲ့ပွဲတွေရှိမယ် စသဖြင့် အကုန်လုံးမကြည့်နိုင်ခဲ့ပါဘူး။ဒီခရီးစဉ်လေးမှာ ကမ္ဘာ့ဒေသအသီးသီးက လာရောက်ပြသကြတဲ့ ကျောက်အရိုင်းတွေ၊ သဘာဝပုံဆောင်ခဲတွေနဲ့ ကျောက်ဖြစ်ရုပ်ကြွင်းတွေ၊ ကျောက်မျက်မျိုးစုံနဲ့ ကျောက်မျက်ပညာရှင်တွေရဲ့ပညာရပ်ဆိုင်ရာ ဟောပြောပွဲလေးတွေက တူစန်မြို့ရဲ့ ဂုဏ်၊ တူစန်မြို့ရဲ့ တန်ဖိုးဆိုတာ သိခွင့်ရခဲ့ပါတယ်။

တူစန်မြို့မှာ အားလုံးက ရူးသွပ်နေကြတယ်၊ ရူးသွပ်နေတဲ့မြို့ကြီးပါကွာ ဆိုပြီး ကားဆရာတယောက်က ပြောသွားတာ သတိရလိုက်တယ်။
ပြန်စဉ်းစားကြည့်တော့လည်း ဟုတ်နေပါတယ်။ ခဲလုံးတွေ၊ အရိုးစုတွေကို ပုံစံမျိုးစုံနဲ့ ခင်းကျင်းပြသကြတယ်။ စုဆောင်းသူတွေ တန်ဖိုးထားနှစ်သက်ပြီး သတ်မှတ်ကြတဲ့စျေးတွေကလည်း မယုံကြည်နိုင်စရာ။ တချို့ကုမ္ပဏီတွေက လာရောက်ပြသရုံသက်သက်၊မရောင်းကြပါဘူး။ ပွဲမှာ ကိုယ့်ရှိတဲ့ ကျောက်တွေ လာကြွားရုံ၊ တမင်ပြသရုံပါ။

နှစ်စဉ်ဖေဖော်ဝါရီ လထဲမှာ ကျင်းပလေ့ရှိပြီး ရာသီဥတု သာယာနွေးထွေးတဲ့အချိန်လို့ ဆိုပါတယ်။ ကိုယ်တိုင်လည်ပတ်တဲ့နှစ်မှာတော့ မိုးလေးတဖွဲဖွဲနဲ့ အေးအေးချမ်းချမ်းရှိခဲ့ပါတယ်။ တကမ္ဘာလုံးက ကျောက်မျက်စုဆောင်းသူတွေ တွေ့ဆုံကြတဲ့ပွဲလို့ ဆိုရင်လည်း မှားမယ်မထင်ပါဘူး။ နေရာအနှံ့ကကျောက်မျက်ပညာရှင်တွေ၊ လုပ်ငန်းရှင်တွေ၊ စုဆောင်းသူတွေနဲ့ သက်ဆိုင်ရာအလိုက် စည်ကားသိုက်မြိုက်တဲ့အချိန်လေးပါပဲ။ အလုပ်တွေလုပ်ရင်းနဲ့ အနားယူနိုင်ကြတဲ့သူတွေထဲမှာ ကျောက်မျက်ဝယ်သူရောင်းသူ စုဆောင်းသူတွေ ပါမယ်ထင်ပါတယ်။ တကမ္ဘာလုံးက အသိတွေနဲ့ ပြန်ဆုံနေကြသလို အားလုံးက ဖက်လဲတကင်းနူတ်ဆက်နေကြတယ်၊ ညဆိုရင်လည်း သက်ဆိုင်ရာအလိုက်ပါတီပွဲလေးတွေနဲ့ သူတို့ကိုကြည့်နေရတာ သီးခြားကမ္ဘာထဲမှာ ရောက်နေသလို လွတ်လပ်စွာနဲ့ အားကျစရာအလွန်ကောင်းပါတယ်။

တူစန်မှာ စိတ်ဝင်စားစရာအကောင်းဆုံးကတော့ ကျောက်မျက်တွေ၊တွင်းထွက်တွေကို အချက်အလက်ရှာဖွေစုဆောင်းတဲ့၊ စမ်းသပ်လေ့လာပြုစုတဲ့ ကမ္ဘာ့အကြီးဆုံး ဓာတ်ခွဲခန်းနဲ့အတူ တွင်းထွက်တွေအများဆုံး စုဆောင်းထားတဲ့ ပြတိုက်ရှိနေခြင်းပါပဲ။ နိုင်ငံတကာက ထွက်သမျှကျောက်မျက်တွေအားလုံး တနှစ်တကြိမ် စုပေါင်းရောင်းချတဲ့ပွဲလည်း ဖြစ်တာမို့ ပညာရှင်တွေ စိတ်တိုင်းကျစုဆောင်းနိုင်ခဲ့တာလည်းပါမယ် ထင်မိပါတယ်။ သိကျွမ်းခွင့်ရတဲ့ ပါမောက္ခတယောက်က တရုတ်ပြည်ကဆိုပေမယ့် တူစန်တက္ကသိုလ်မှာ တွင်းထွက်ကျောက်မျက်နဲ့သက်ဆိုင်တဲ့ ဘွဲ့လွန်ဒီပလိုမာကို ရရှိခဲ့ပါတယ်။ တူစန်မြို့ရဲ့ အကြောင်းကို ရန်ကုန်မှာ တွေ့စကတည်းက ပြောပြခဲ့ပြီး လာရောက်ဖို့ ဖိတ်ခဲ့သူမို့ ကျေးဇူးအထူးတင်ရပါတယ်။ တူစန်ရောက်တော့လည်း တက္ကသိုလ်ထဲအထိ အလည်အပတ်ခေါ်ခဲ့ပြီး သိချင်တာတွေအားလုံးကို ရှင်းပြပေးခဲ့သူပါ။ ကျွန်တော့ရဲ့စိတ်ဝင်စားမှု၊ ဝါသနာအပေါ်မှာ တန်ဖိုးထားဆက်ဆံပေးခဲ့လို့ အမြဲအမှတ်ရနေမှာပါ။

ဒေါ်လာသန်းဆယ်နဲ့ချီတန်တဲ့ ဒိုင်နိုဆောကျောက်ဖြစ်ရုပ်ကြွင်းတွေ၊ ပေနှစ်ဆယ်သုံးဆယ်အမြင့်ရှိတဲ့ ခရမ်းစွဲ ဂျီအုတ်တွေ၊ လက်တစ်ထွာတစ်တောင်လောက်သာရှိပေမယ့် ဒေါ်လာသိန်းချီတန်တဲ့ တိုမလင်းပုံဆောင်ခဲတွေ၊ မြပုံဆောင်ခဲတွေ၊ စလင်းစိမ်းမြပြာပုံဆောင်ခဲတွေ၊မြန်မာငွေသိန်းရာချီတန်တဲ့ မိုးကုတ်ပုလဲခဲကပ်တွေ၊ ဗဟန်းရွှေဝါခဲကပ်တွေစသဖြင့် ရင်သပ်ရူ့မောကြည်ခွင့်ရခဲ့တာ ကျွန်တော့အတွက်တော့ အဖိုးအတန်ဆုံးအချိန်တွေလို့ပဲ ပြောချင်ပါတယ်။ Fine mineral လို့ခေါ်တဲ့ အပ်ရာတပေါက်မှ အပြစ်အနာမပါဖို့ မိုင်းတွင်းထဲကနေ အသေအချာထုတ်ယူ၊ ဆေးကြောကြတဲ့ နည်းပညာတွေက အံ့ဩစရာကောင်းနေသလို တန်ဖိုးများအတွက်လည်း စနစ်တကျမြှပ်နှံပေးဆပ်ထားကြတာ အတုယူစရာပါ။

'ဒါကတော့ ရောင်းဖို့မဟုတ်ပါဘူး၊ ပြထားပေးတာပါ၊ ဒီမိုင်းတွင်းကပဲထွက်တဲ့ တခြားပစ္စည်းတွေကိုတော့ ရောင်းပေးပါတယ်'၊ 'ကျွန်တော့အဖိုး ဘယ်နှစ်ခုနှစ်က တွေ့ခဲ့တာ၊ ဒီမိုင်းကို အခုချိန်ထိ မိသားစု လုပ်နေတုန်းပါ' ဆိုပြီးရှင်းပြခဲ့သူတွေကိုတွေ့ရှိရသလို၊ 'ငါ့ယောက်ကျား ပထမဆုံးတွေ့ခဲ့တဲ့ မျိုးစိတ်သစ် လိပ်ကလေးပါ'။' 'ပြတိုက်တခုမှာ သိမ်းထားလို့ ဒါလေးကတော့ ဓာတ်ပုံလေးပဲပါတယ်' စသဖြင့် ရာဇဝင်ကိုယ်စီရှိကြတယ်။သမိုင်းတွေကို တလေးတစားနဲ့အမြတ်တနိုးဂုဏ်ယူကြသူတွေကို တွေ့မိပြန်တော့ ခြေရာများရဲ့ တန်ဖိုးကိုနားလည်ခဲ့ရပါတယ်။တခမ်းတနားနဲ့ ဂုဏ်ယူနေကြတဲ့ သူတို့ရဲ့မျက်နှာက တန်ဖိုးတွေကို ဖတ်နေမိတယ်။

ကျောက်ထွက်တဲ့နိုင်ငံတွေဖြစ်တဲ့ ဘရာဇီး၊ သီရိလင်္ကာ၊ ကိုလံဘီယာ၊ မဒါကားစကား၊ ပါကစ္စတန်၊ အမေရိက ပြည်နယ်အစုံ၊ မက္ကဆီကို ၊ အီတလီ၊ ဂျာမနီ၊တရုတ်ပြည်၊ အိန္ဒိယ အပြင် နေရာအနှံ့က ကျောက်မျိုးစုံနဲ့ လာရောက်ပြသကြပါတယ်။ဒီနေရာမှာ နိုင်ငံတကာစျေးကွက်၊ နိုင်ငံတကာအမြင်လေးတွေကို သိခွင့်ရခဲ့လို့ တန်ဖိုးရှိလှပါတယ်။

ကိုယ့်နိုင်ငံမှာလည်း ကျောက်မျက်တွေအမျိုးအစားအစုံထွက်ရှိပါတယ်။ နိုင်ငံအတွက်လေ့လာမှတ်တမ်းတင်ဖို့၊ စုဆောင်းပြသနိုင်ဖို့၊ စီးပွားဖြစ်နိုင်ငံတကာလို လုပ်နိုင်ဖို့ လိုအပ်နေပါသေးတယ်။ပတ္တမြား၊နီလာ၊ကျောက်စိမ်းကောင်းကောင်းတွေကို ကျောက်မျက်အဖြစ်သတ်မှတ်သလို ကျန်တဲ့ကျောက်တွေကိုလည်း
တန်ဖိုးထားစေချင်မိပါတယ်။

သူတို့နိုင်ငံတွေမှာ တန်ဖိုးနည်းတဲ့ ဗဟန်းရွှေဝါတွေ၊ မိုးကုတ်ပုလဲတွေ၊ စသဖြင့် အရောင်းအဝယ်ဖြစ်နေကြပါတယ်။ မြန်မာပြည်မှာလည်း တန်ဖိုးကြီးတဲ့ အညံ့ပန်းတွေခဲကပ်တွေ၊ တိုမလင်းတွေခဲကပ်တွေ၊ ပတ္တမြားနီလာခဲကပ်တွေအပြင် တန်ဖိုးနည်းတဲ့ ဗဟန်းရွှေဝါ၊ မိုးကုတ်ပုလဲ၊ ငုကျောက်လှလှတွေကို ဖြစ်သလို အဆင်ပြေသလို မတူးဖေါ်ကြပဲ စနစ်တကျ လှလှပပ ထုတ်ဖေါ်နိုင်ခဲ့ရင်တော့ အလေအလွှင့်လျော့နည်းပြီး တဖက်တလမ်းက အကျိုးရှိမယ်လို့ မြင်မိပါတယ်။

ကျောက်စိမ်း၊ပတ္တမြားနီလာတွေကိုမဲပြီးလုပ်နေချိန်မှာ လူတွေသိပ်မလုပ်ဖြစ်ကြတဲ့ တခြားကျောက်မျက်တွေထွက်တဲ့ ခဲတောင်တွေ၊ ကျောက်ထွက်တဲ့နေရာတွေက တနံတလျား များစွာရှိနေကြပါသေးတယ်လို့ မြင်မိပါတယ်။ အကျိုးရှိရှိသုံးစွဲခွင့်မရှိကြပဲ လျင်သလို၊ ဦးသလို၊ ဖြစ်သလို၊ အလုအယက် ထုတ်ယူနေကြတာတွေက အဖိုးတန်တွေကို ဖျက်ဆီးပစ်လိုက်သလိုပါပဲ။ စနစ်တကျတူးဖေါ်ခဲ့ရင် တန်ဖိုးရှိမယ့်ကျောက်တွေက ဖြစ်သလို စနစ်တကျ မတူးဖေါ်နိုင်လို့ ကျိုးပဲ့ပျက်စီးကြခဲ့တာ မရေတွက်နိုင်အောင်ပါ။ မိုင်းရှူးကုန်ပြီ၊ ဖားကန့်ကုန်ပြီ၊ မိုးကုတ်ယဲ့ယဲ့။ကရင်ပြည်နယ်ဆိုရင်လည်း စိတ်ဝင်စားစရာကျောက်အစုံရှိသလို ကချင်ပြည်နယ်မှာလဲ ကျောက်အစုံရှိပါတယ်။ဒါတွေကိုလည်းစနစ်တကျ ကိုင်တွယ်ထိမ်းသိမ်းပြီး အကျိုးရှိရှိထုတ်ယူနိုင်ဖို့ အရေးကြီးလှပါတယ်။

တန်ဖိုးများစွာရှိနေသေးတဲ့ တန်ဖိုးများစွာကျန်နေသေးတဲ့ တခြားကျောက်မျက်ရတနာတွေကိုလည်း စနစ်တကျ ထိမ်းသိမ်းဖို့၊ တန်ဖိုးထားတတ်ဖို့၊ နည်းမှန်လမ်းမှန် ထုတ်ယူနိုင်ဖို့ အရေးကြီးပါတယ်။ ပညာရပ်ဆိုင်ရာ နယ်ပယ်ကပညာရှင်တွေနဲ့ အုပ်ချုပ်သူတွေပူးပေါင်းပြီး ဘယ်အခန်းကဏ္ဍမှာမဆို လုပ်ဆောင်နိုင်မှသာ အကျိုးရှိပြီး တန်ဖိုးတွေဖြစ်လာမှာပါ။

ကိုယ့်နိုင်ငံမှာ crystal, mineral တွေနဲ့ပတ်သတ်ပြီးတော့ တန်ဖိုးရှိရှိအသုံးချနိုင်ဖို့ လိုအပ်နေပါတယ်။ ဒီပုံအတိုင်းပဲ ဆက်သွားကြမယ်ဆိုရင်တော့ သဘာဝရဲ့ လက်ဆောင်တန်ဖိုးတွေ ရသင့်သလောက်မရနိုင်သလို တန်ဖိုးမဲ့ လေလွှင့်သွားကြရဦးမှာပါပဲ။
2019

27/01/2026

(၅၁)
ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ (၅၁)

ပုံမှန်စိတ်တွေနဲ့ နေလို့ထိုင်လို့မရတဲ့ လောကဓံက ရှည်ကြာလွန်းနေသလားလို့ တွေးမိတယ်။ လဲကျရင်ပြန်ထ ဆိုတဲ့စကားလောက်နဲ့ မိုတီမရနိုင်တော့ဘူးလို့ထင်မိတယ်။ လဲကျရုံမှမဟုတ်တာ နစ်မြုပ်သွားခဲ့ရတဲ့ ဘဝတွေများစွာမဟုတ်လား။

ပညာရပ်တခုအပေါ်မှာ ကြံကြံခံရပ်တည်နိုင်ဖို့ စဥ်ဆက်မပြတ် လေ့လာ၊မှတ်သား၊ကြိုးစားရှာဖွေ အားထုတ်ကြမှမဟုတ်လား။ စာတွေ့၊ လက်တွေ့အပြင် အရေးအကြီးဆုံးဖြစ်တဲ့ လုပ်ငန်းခွင်အသိုင်းအဝန်းကြီးထဲမှာ လှုပ်ရှားရုန်းကန်နိုင်ဖို့ကလည်း အမြဲလိုအပ်နေပါတယ်။ ပျက်စီးသွားတဲ့ အဖွဲ့အစည်း၊အသိုင်းအဝိုင်းကြီးတွေကို နှမြောသတိရနေမိတာအမှန်ပါ။

စုံဆန်ချီသွားခဲ့ရတဲ့ ရတနာမြေတွေ၊ စိတ်ကူးထဲမှာချမှတ်ထားတဲ့ ခရီးစဥ်တွေ၊ မရောက်ဖြစ်သေးတဲ့ ရတနာရှိရာဒေသတွေ၊ ရတနာပြပွဲတွေက ကိုယ်နဲ့ဘာမှမဆိုင်သလို ခံစားလာရတယ်။ ဓါတ်မီးတလက်နဲ့ တနေကုန်လိုက်ထိုးကြည့်ခဲ့တဲ့ ကျောက်စိမ်းတုံးကြီးတွေ၊ အရည်အသားမျိုးစုံ၊ကာလာစုံကျောက်စိမ်းတွေ။

ခန့်ထည်တဲ့မီးရောင်အောက် တန်ဖိုးကြီးရတနာတွေကို မကြည့်ရတော့တာ ဘယ်လောက်တောင်ကြာနေပြီလဲလို့ ပြန်တွေးမိတယ်။ ခေါ်စျေး၊ပေါက်စျေး၊ရောင်းစျေးတွေနဲ့ ရင်းနှီးခွင့်မရတဲ့ကျောက်သမားတယောက်က ဘယ်လိုအသက်ရှင်နိုင်ပါတော့မလဲ။

ကံကောင်းစွာနဲ့ နေ့စဥ်ရတနာလေးတွေကိုမြင်တွေ့ခွင့်ရနေသေးတဲ့အခွင့်အရေးကြောင့် စိတ်ကျေနပ်ရပါတယ်။ တချို့အချိန်နာရီတွေကို မေ့ထားပစ်နိုင်ပါတယ်။ ဒါပေမယ့်လည်း အရောင်းအဝယ်ပါးလာကြတဲ့ ကုန်သည်တွေ၊ ရောင်းဖို့အခွင့်အရေးမရှိသေးတဲ့ကုန်သည်တွေကို မြင်ကြားတွေ့နေရတော့ စိတ်မပျော်ဖြစ်ရပြန်တယ်။

အထွေထွေကုန်ကျစရိတ်တွေကြားမှာ အရောင်းအဝယ်မဖြစ်၊ဆိုင်ခင်းငုတ်တုတ်ထိုင်နေကြရတာ မလွယ်ကူလှပါဘူး။

'အားတင်းထားပါဦး' လို့ တယောက်လက်တယောက်ဆုပ်ကိုင်ပြီး မနှစ်သိမ့်နိုင်ကြတော့ဘူး။ ကိုယ်တိုင်အားတင်းပြီး နိုးထလာရတဲ့မနက်ခင်းတွေက များစွာမဟုတ်လား။

'ငလျင်ကြီးပြီးကတည်းက ဒီတခုပဲရောင်းရသေးတယ်ဗျာ' တဲ့။

ငလျင်ကြီးကြောင့် ဆိုင်ပြန်မဖွင့်နိုင်သေးသူတွေလည်း များစွာပါ။
ငလျင်ကြီးကြောင့် ဘယ်တော့မှပြန်မလာနိုင်ကြတဲ့ ကုန်သည်တချို့လည်း ကြားသိနေရတယ်။

ဘယ်လိုလောကဓံပဲဖြစ်ဖြစ်ပေါ့
ငါ အသက်ရှိသေးတယ်ဆိုတဲ့ စိတ်လေးတခုဝင်လာရင် အဆင်ပြေအောင်နေထိုင်နိုင်ဖို့ အခွင့်အရေးရှိပါတယ်။

လောကဓံအပြင်
သေမထူးနေမထူးအလိမ်အညာသမားတွေ၊ ခိုးဆိုးလုယက်သူတွေရဲ့ ဘေးအန္တရာယ်တွေကပါ ထပ်ဆောင်းအပိုလက်ဆောင်ပါနေတော့ ရတနာသမားတွေ/ကျောက်သမားတွေ ဂရုစိုက်နေထိုင်ကြဖို့ အရေးကြီးပါတယ်။

စိတ်ကူးထဲက မြန်မာ့ရတနာလောကကြီးကို
စိတ်မကူးဖြစ်တာ ဘယ်လောက်တောင်ကြာသွားခဲ့ပြီလဲ။
5 / 2025

25/01/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ (၅၀)

သင်တန်းသားတွေနဲ့အရောင်းအဝယ်အကြောင်း ပြောဖြစ်တော့ ....
တစ်ဦးကစပြောတယ်။
အရောင်းအဝယ်အလုပ်က ပွဲစားကိုပဲ အားကိုးရတာလား? ပွဲစားက နေ့တိုင်း ကျောက်လာလာ တောင်းတယ်။ အခုမှ စဖွင့်တာဆိုတော့ ကျောက်ကို မထည့်ပေးရဲဘူး။ ဝယ်မယ့်သူ ခေါ်လာဆိုတော့လည်း မခေါ်လာပေးဘူး။ ဇွဲကတော့ မလျော့ဘူး။ တရက်ကို သုံးလေးကြိမ်လာပြီး တောင်းလေ့ရှိတယ်။ ဆိုင်မှာတော့ ရောင်းသူဝယ်သူ မလာကြဘူး။ ပွဲစားတန်းမှာတော့ လူအပြည့်ပဲ တဲ့။

နောက်ထပ်တဦးကလည်း ယုံကြည်အောင်လုပ်ပြီးရင် ပွဲစားတွေက ကျောက်တွေအများကြီး မ ပြေးကြတာပဲလေ တဲ့။

နောက်ထပ်တဦးက ကျောက်အရောင်းအဝယ်တော့ မလုပ်ရဲတော့ပါဘူး။ ရမှာကနဲနဲ။ ရင်းရမှာကများများနဲ့ မတော်လို့များ ပွဲစားတွေက လိမ်သွားရင် ဘာမှလည်းမလုပ်တတ်။ ဥပဒေအကြောင်းရလဲ ကိုယ့်ဘက်မရှိ။ ရဲစခန်းတိုင်ရင်လည်း ကိုယ့်အမှု ကိုယ်ပြန်ပတ်နေကြတာတွေ ကြားဖူးနားဝရှိနေတော့ မလွယ်ကြောပဲ တဲ့။

ကုန်သည်အရင့်အမာကြီးတွေအတွက် ခက်ခဲတဲ့ပုစ္ဆာတခုမဟုတ်ပေမယ့် တကယ်တမ်းဖြစ်လာရင်လည်း ဆုံးရှုံးသွားရတာချည်းတွေပါပဲ။ ဝါနုသေးတဲ့ အခုမှ ဝင်ရောက်လုပ်ကိုင်မယ့်သူတွေအတွက် အရိပ်မည်းကြီးက ရှိနေတော့ တကယ်ကို ဘယ်ကစ ဖြေရှင်းရမလဲဆိုတာ ခေါင်းကျိန်းရပါတယ်။

အလိမ်မခံရဘူးတဲ့၊ မလိမ်ဘူးဆိုရင်တောင် မပါသွားဘူးတဲ့ ကျောက်သမား မရှိနိုင်ဘူးလို့ ထင်မိပါတယ်။ အားနည်းချက်ကိုက ယုံကြည်မှုအပေါ် မှီခိုရလွန်းလို့ပါပဲ။ ခံနိုင်ရည်ရှိတဲ့ ပမာဏဆိုရင် ပြဿနာမဟုတ်ပေမယ့် ခံနိုင်ရည်မရှိတဲ့ပမာဏတွေမှာဆိုရင်တော့ ကိုယ့်ပိုက်ဆံနဲ့ကိုယ်၊ ကိုယ့်ပစ္စည်းနဲ့ကိုယ် ပင်ပမ်းဆင်းရဲ ဒုက္ခရောက်ကြရပါတယ်။ တခါတရံ ယုံစားမိလို့ ကြားညှပ်ပြဿများစွာကလည်း ကျောက်သမားတယောက်ရဲ့ ကြုံတွေ့နေကြ ဇာတ်လမ်းတခုပါပဲ။

နောက်ထပ်တယောက်က ထပ်ပြောတယ်။ သူ့အမျိုးတွေ ဒီလိုပဲ လုပ်နေတာ နှစ်ပေါင်းများစွာကြာပြီ။ သူဌေးတွေတောင် ဖြစ်နေကြပြီ။ မလိမ်မညာပဲ၊ အသိသတိနဲ့ လုပ်ရင် ရပါတယ်။ အချိန်တခုတော့ရင်းရမယ်။ သူ့ရဲ့ ရိုးသားမှု့နဲ့ ရပ်တည်မှုကို ယုံကြည်လွန်းလို့ လာအပ်နှံကြသူတွေ အများကြီးပါ တဲ့။

အမှန်ပါပဲ။ ကိုယ့်ရဲ့ရပ်တည်ချက်က ပထမဦးစားပေးပဲ ဖြစ်ရမှာပါ။ သူများတကာရဲ့ အလိမ်အညာမမိဖို့ အသိသတိလေးကပ်ရင်း လောဘမကြီးဖို့ အရေးကြီးပါတယ်။ မေးစရာတခု ထပ်ပေါ်လာပါတယ်။ ပုံမှန်လုပ်နေသူတွေရော မခံရဘူးလားဆိုတာ။ သိပ်ခံရတာပေါ့။ အနည်းအများ ခြေရာကိုတော့တိုင်းလို့ ဘယ်ရပါ့မလဲ။ ကျားကြီးခြေရာကြီးပေါ့။ သူ့အတိုင်းအတာနဲ့သူပါပဲ။ ငွေအရေအတွက်ကိုတော့ မချိန်ထိုးသင့်ပါဘူး။ ရယ်စရာပြောရရင် ဝယ်ရောင်းလုပ်နေတာက ဆယ်ဂဏာန်း၊ ထောင်ဂဏာန်းအလိမ်ခံရမှာ ကြိုတွေးကြောက်နေသလိုပေါ့။

အဖြစ်နိုင်ဘူးလားဆိုတော့လည်း ဖြစ်နိုင်ပါတယ်။ ကြားကနေ တန်ဖိုးကြီးကျောက်တွေကို အာမခံ ယူပေးမိတာမျိုးပေါ့။

ပုံမှန်လုပ်ကိုင်နေသူ ရောင်းဝယ်နေသူတွေက ထာဝရရှိနေမှာပါ။ ပူပန်ပြီး တွေးမကြောက်ဖို့ပဲလိုတာပါ။ ပထမဆုံးအနေနဲ့ ဘာကျောက်လဲ၊ ဘယ်လောက်ပဲတန်တယ်ဆိုတဲ့ အသိပညာရအောင်ယူပါ။
ဒုတိယအနေနဲ့တော့ ကိုယ့်ပတ်ဝန်းကျင်ကလူတွေကို အမြဲ သတိဝရိယနဲ့ စောင့်ကြည့်ပါ။ ဆိုလိုတာက ကိုယ်တိုင်က ဘယ်လို ပတ်ဝန်းကျင်ထဲရောက်နေသလဲ ဆိုတာမျိုးပေါ့။

တတိယအနေနဲ့ သိက္ခာရှိစွာ ဂတိတည်စွာ ကိုယ်တိုင်က လုပ်ကိုင်ပေးပါ။ ဒါဆိုရင် ကိုယ့်အတွက်ရော၊ ကျောက်လောကအတွက်ရော၊ တိုင်းပြည်အတွက်ပါ ရတနာတခုလို လင်းလက်ပြီး တန်ဖိုးရှိနေမှာပါ။ဂုဏ်သိက္ခာရှိစွာနဲ့လည်း ရေရှည်ရပ်တည်နိုင်ကြမှာပါ။

23/01/2026

ကြုံ​​​တွေ့ရ ရတနာ​လောကနှင့် စိတ်ကူးထဲကအ​တွေးများ (၄၉)

ပထမဆုံးအိမ်မှာမင်္ဂလာဖြစ်တဲ့ကျောက်ကလေးတွေ။

မင်္ဂလာလို့ ကျောက်သမားတွေက အမြဲသုံးကြပါတယ်။ မင်္ဂလာရှိသွားတာပေါ့။ ရောင်းသူပဲဖြစ်ဖြစ်၊ဝယ်သူပဲဖြစ်ဖြစ်၊ ၂ဦးလုံးပဲဖြစ်ဖြစ်ပေါ့။

အမြတ်ရမှဝယ်မယ်ဆိုတဲ့ စိတ်တခုတည်းနဲ့ ခရီးသွားလို့မရတာကို အတွေ့အကြုံတွေအရ သင်ကြားခံခဲ့ရပြီးပါပြီ။

မျက်နှာဆိုတဲ့ ၂ဘက်နားလည်မှုကသာ ခရီးတခုကို အတူတူသွားနိုင်ကြတာပါ။

အမြဲသာဖို့ထက် အသာရခဲ့တဲ့ဘက်မှာ အမြဲရှိမနေပဲ အနာခံပေးဖို့လိုအပ်လာရင်လည်း အနစ်နာခံပေးရတာတွေကို ရေရှည်လက်တွဲနေသူတွေ သိကြပါတယ်။

သေချာတာက ကိုယ်ကျိုးတခုတည်းက နှစ်တွေအများကြီးလက်တွဲဖို့ခက်တာပါ။ မြတ်ပါလိမ့်မယ်၊ အချိန်တခုမှာမရပ်ပဲ ခရီးဆက်လို့ အကျိုးအမြတ်ရှိနိုင်ဖို့ တခါတလေ အမြတ်ထဲက ပြန်ရင်းရမှာပါ။

အရှုံးခံပြီးလုပ်တယ်ဆိုတာမျိုး ကျောက်လောကမှာ တကယ်ရှိမယ်လို့ မထင်ပါဘူး။ အကျိုးအမြတ်ထဲက ဘယ်လောက်ခွဲပေးမလဲ၊ အဆင်မပြေချိန်အမြတ်ထဲက ဘယ်လိုချိန်ထိုးပြီး ကြည့်ပေးနိုင်မလဲဆိုတာကိုသာ တွေ့ကြရမှာပါ။

တခုတော့ရှိပါတယ်၊ ကြုံလည်းကြုံခဲ့ရပါတယ်။ ဘာအကျိုးမှမမျှော်လင့်ပဲ ကူညီဝယ်ယူပေးတတ်တဲ့ မိတ်ဆွေတွေ။ ဒီလိုမိတ်ဆွေမျိုးကြုံတွေ့ခွင့်ရရင်တော့ မင်္ဂလာအကြီးကြီးဖြစ်ပါပြီ။ ကံကောင်းပြီ၊ အကျိုးပေးပြီလို့ မှတ်ယူရမှာပါ။

ဘယ်လိုပဲဖြစ်ဖြစ် ခက်ခဲနေကြတဲ့ကာလရှည်ကြီးထဲမှာ အရောင်းအဝယ်ဖြစ်ကြတဲ့ မင်္ဂလာဖြစ်ကြတဲ့သူတွေကိုယ်စား ပျော်ရွှင်ဝမ်းသာမိပါတယ်။ တဖက်မှာလည်း ထွက်ခွာသွားသူတွေ၊ အကွေ့အကောက်အလိမ်အညာသမားတွေရဲ့ ဒဏ်ခံရသူတွေပိုများလာသလားလို့ ပူပန်ရပါတယ်။

အလှည့်အပြောင်း၊အချိုးအကွေ့တွေပိုများကြရတဲ့ ပရမ်းပတာအချိန်ကာလကြီးမှာ သားကောင်မဖြစ်ဖို့ ပိုလို့ဂရုစိုက်ကြရမှာပါ။ ကိုယ်တိုင်လည်း တပါးသူရဲ့မျက်ရည်၊ တပါးသူရဲ့ဘဝတွေချမနင်းဖို့ လူစိတ်ရှိရပါဦးမယ်။အမှန်ကိုမြင်နိုင်ဖို့ အသိတရားရှိရပါဦးမယ်။ 24/5/2025

တဆက်တည်းမှာပဲ ချစ်ခင်ရသူတွေ၊ လုပ်ဖော်ကိုင်ဖက်တွေ၊ခရီးတူသွားကြရတဲ့လောကသားတွေအတွက် မောင်စိန်ဝင်း (ပုတီးကုန်း)ရဲ့ကဗျာလေးသဘောကျလို့ ကူးယူဖော်ပြလိုက်ပါတယ်။

" အသက်ရှင်ပါ
မနက်မင်္ဂလာလို့နှုတ်ဆက်ဖို့..
.........
အမှောင်ကျလည်း
ဦးနှောက်ထဲမှာလင်းနေပါစေ...

အဆက်အသွယ်မရလည်း
နှလုံးသားထဲမှာနွေးနေပါစေ.

ပြန်ဆုံမည့်ရက်
အရုဏ်တက်ကို
အသက်ဆွဲဆန့်ကြိုနိုင်ကြပါစေ..."

မောင်စိန်ဝင်း (ပုတီးကုန်း)

Address

No. 52, Ground Floor, AungThapyay Street, Sanchaung Township
Yangon
11111

Opening Hours

Monday 09:30 - 16:30
Tuesday 09:30 - 16:30
Wednesday 09:30 - 16:30
Thursday 09:30 - 16:30
Friday 09:30 - 16:30
Saturday 09:30 - 16:30
Sunday 09:30 - 16:30

Telephone

+9595501098

Website

Alerts

Be the first to know and let us send you an email when JEWEL HOUSE posts news and promotions. Your email address will not be used for any other purpose, and you can unsubscribe at any time.

Contact The Business

Send a message to JEWEL HOUSE:

Shortcuts

Share

Category