09/06/2026
ကုသိုလ်ချည်းလုပ်ပြီး
မကျင့်လည်း မရဘူး ...
တရားသာများများကျင့်
ကံကောင်းလာလိမ့်မယ် ...
ဉာဏ်ပွင့် ... ကံပွင့်
တရားအားထုတ်တိုင်း လူတိုင်း ရကြလား
လို့မေးရင်
လူတိုင်း မရကြပါဘူး ။ ရတဲ့ လူသူလဲ
ရှိသလို ၊ မရတဲ့သူလဲ ရှိပါတယ် ။
ဒါဆိုမေးစရာဖြစ်လာပြီ ၊
ဘာကြောင့် ကြိုးစားအားထုတ်ပါရဲ့
သားနဲ့ မရတာလဲဆိုတော့
သူတို့ကံတွေက ပိတ်ထားလို့ပါ၊
တနည်းပြောရရင်အချိန်မတန်သေးလို့ပေါ့ ။
အံ့သြဖို့ကောင်းပါတယ် ။
အခုပစ္စုပ္ပန်ကံတွေသာ ကောင်းနေတာ
အတိတ်က ကံတွေ မကောင်းတဲ့အတွက်
အဲ့ဒီကံတွေက လာပိတ်တာတွေရှိတယ် ။
ဒါပေမယ့်လုပ်သာလုပ် ၊
လုပ်ရင်းနဲ့ ဒီကံတွေက ပါးပါးသွားလိမ့်မယ်၊
မကောင်းတာတွေကုန်သွားပြီး
ကောင်းတာတွေဖြစ်လာမယ် ။
ဘုန်းဘုန်း ဥပမာလေး တစ်ခုပြောပြမယ် ၊
ဘုန်းဘုန်း တပည့်တွေလည်း သိကြပါတယ် ။
ဘုန်းဘုန်း လူ့ဘဝတုန်းက ရန်ကုန်တက်လာပြီး အလုပ်လုပ်တော့ ငှားနေတဲ့အိမ်က ဘုန်းဘုန်းကို မောင်အရင်းတစ်ယောက်လိုချစ်ခင်ပြီး စောင့်ရှောက်ထားတဲ့အိမ်ရှင် တွေရှိခဲ့ဖူးတယ် ၊
သူတို့က မိသားစုဝင်တွေများတော့
ချို့တဲ့ကြတယ် ။
စားစရာရှိလည်း ဘုန်းဘုန်းက
သူတို့ကို ကျွေးတယ်၊
အပြန်အလှန် စောင့်ရှောက်ကြတာပေါ့ ။
အဲ့ဒီလိုနဲ့တရားတွေကျင့်ပြီး ရဟန်းဘဝရောက်တော့သွားသတိရပြီး သြော်ငါ့အပေါ်မှာကျေးဇူးရှိတဲ့ လူတွေကို ငါသွားပြီး ကူညီပေးဦးမှပဲဆိုပြီး ပိုက်ဆံလေး ၁၀သိန်း ယူပြီးသွားတာ
ရန်ကုန်ရောက်တော့မှ တခြားကိစ္စပေါ်လာပြီးမသွားဖြစ်တော့ဘူး ။
အဲ့ဒီအချိန်တုန်းက ဘာကြောင့်မသွားဖြစ်လဲဆိုတာ
ဘုန်းဘုန်းလဲ မရိပ်မိ လိုက်ဘူး ။
နောက်ထပ် တစ်နှစ်လောက်ကြာတော့ ထပ်သတိရသွားပြန်တယ် ၊ သွားဦးမှပဲဆိုပြီး ဒီတခါလဲ ပိုက်ဆံ၁၀သိန်းပိုက်ပြီးသွားတာပဲ ၊ ထပ်လွဲသွားပြန်တာပဲ ။
ရန်ကုန်ရောက်မှတော့ သာကေတ ဆိုတာနီးနီးလေးပါ
ဘာနဲ့သွားသွားရတဲ့ဟာကို မရောက်ဖြစ်ပြန်ဘူး ။
၃ ၊ ၄ ခါလောက်ကြာမှသတိထားမိတော့ ဆင်ခြင်ကြည့်လိုက်အုံးမှပဲဆိုပြီး ဆင်ခြင်ကြည့်လိုက်တော့မှပဲ
ဪ ဘုန်းဘုန်းသွားပြီး ကူညီလို့မရအောင်
သူတို့ ကံတွေက ပိတ်ထားတာကိုးလို့ သိလိုက်ရတယ် ။
ဒါ့ကြောင့်မို့ ငါကောင်းတာတွေ ဒီလောက်လုပ်နေရဲ့သားနဲ့ ငါထင်သလောက်မရပါလား ။ ငါ့ကို ဘယ်သူမှ မကူညီ ၊ နတ်တွေလဲ မ " မ " စ ပါဘူးလို့ မအောင့်မေ့နဲ့ ။
ကိုယ့်မှာ ပိတ်ထားတဲ့ ကံတွေ ရှိတယ် ။
နတ်တွေက " မ " ချင်တယ် ဒါပေမဲ့ မရလို့ ။
ဒီကံတွေ ကုန်သွားရင် " မ " မှာပါ ။
ယောဂီတွေကို ဘုန်းဘုန်းမှာ ချင်တာက ၊
ငါကောင်းတာလုပ်ရဲ့နဲ့ ကောင်းတာမဖြစ်ပါလားလို့ အပြစ်မမြင်ပါနဲ့ ကိုယ့်အကုသိုလ်ကံတွေက ပိတ်ထားတာပါ ။
အဲဒီအကုသိုလ်ကံတွေကုန်သွားရင် ကုသိုလ်ကံတွေလာပါလိမ့်မယ် ။
အတိတ်ကလည်း မကောင်းတာတွေလုပ်တယ် ၊
ပစ္စုပ္ပန်လည်း မကောင်းတာတွေ လုပ်နေမယ်ဆိုရင်
အဲ့ဒီကံတွေကရှည်ပြီး မဆုံးနိုင်တော့ဘူး ။
ဒုက္ခတွေနဲ့ ဆင်းဆင်းရဲရဲ နေရတယ် ။
သူကောင်းကောင်း ၊ မကောင်းကောင်း
ကိုယ့်တရားသာကိုယ်လုပ် အကုသိုလ်ကံတွေက
ပါးပါးလာလိမ့်မယ် ၊ ဖယ်ပေးရမယ် ၊
ကုသိုလ်ကံတွေကရောက်လာလိမ့်မယ် ။
အဲ့ဒီလိုသဒ္ဓါတရားနဲ့ ကျင့်ကြပါ ၊
ကိုယ်ကျင့်တာကတော့မဂ်လမ်း၊
ဖိုလ်လမ်းမှာကျင့်နေတာပါပဲ ၊
ဒါပေမဲ့ နောက်က ကျွဲကူးရေပါ
ပါသလိုမျိုး ၊
အခုနေ ဘုန်းဘုန်းက ရေပေးပါလို့
တောင်းရင် ၊ ရေချည်ပဲရလား
ခွက်ပါ ပါသလား ၊
ဘုန်းဘုန်းတောင်းတာကတော့ ရေပါ ၊
ဒါပေမဲ့ ခွက်ကလိုအပ်လို့ကို ပါလာတာပါ ။
အဲ့ဒီလိုပါပဲ ဒီတရားသာ ကြိုးကြိုးစားစား အားထုတ်ကြပါ ၊
လောကုတ္တရာရအောင် အားထုတ်ရင်း
နဲ့ လောကီတွေအကုန်ကပ်ပါလာပါလိမ့်မယ် ။
လောကုတ္တရာရေကိုသာ ရအောင်ယူပါ ။
လောကုတ္တရာရေနဲ့ ထိုက်တန်တဲ့
လောကီရေခွက်ကတော့
သူ့အလိုလို ပါလာပါလိမ့်မယ် ။
ကြိုးစားပမ်းစားနဲ့ ကျင့်ကြံအားထုတ်
ကြပါယောဂီတို့ ။
#ပဲခူးအောင်သုခဆရာတော်ဘုရားကြီး
#ဟောတော်မူသောတရားတော်🙏
