20/01/2026
Гал Морин жилийн хишиг буян дуудна.
Маргааш 1 сарын 21 нд өвлийн сүүл сарын шинийн 3 тохиож байгаа тул жилдээ ганц уншдаг эдийн бурхадын зан үйл тахилга үйлдэнэ.
Өдөр 15: 30-16:30 хооронд.
Хаяг: Төв Гандан хийдийн зүүн урд тойрог, Туулын 6, 119а тоот
Уншуулах нь чатаар холбогдоно уу.
Даллаганы уут, идээ авчрах.
Өртөгтэй
Эд баялаг ба эдийн тэнгэрс
Эрх баялгийн эзэд, хишгийн тэнгэрсэд: Замбал, Намсрай, Гонгор, Гүргүл, Күбера, Цогдогмарав тэргүүтэй эдийн тэнгэрийн хаан Варна Шавари, Норжүнма, Улаан дарь эх тэргүүтэй тэдгээрийн хишиг хайрлагч тэнгэрүүд, хүрээлэгчид багтдаг.
Замбал бурхан үүссэн домгийг Төвөд судар эхээс нь орчуулж хүргэе.
Эдийн эзэн замбал бурханы үүднээс эдийн тахил, даллага үүссэн дамжлага увдисыг Энэтхэгийн эртний мэргэн Жовуужи Балдан Адиша дээдсээс уламжлалтай эд баялгийн бүтээл аргачлал эдүгээ хүртэл дэлгэрчээ. Энэ уламжлал бол нэгдүгээрт ном бүтээлчин шавь нар болон олон амьтны амны хишиг, буян, эдээр хоосорсныг арилгах бүтээлийн олон янзын аргачлалтай зан үйл бий хэмээн зарлигласан байдаг.
Эрт урьдын цагт Дивамгара хэмээх номтон Ганга мөрөнгийн хаяанд залрах үед зам дээр нэг хүн хэвтэж байв. Энэ хүнд юу болов гээд хүнээс асуухад өлсгөлөнгөөр үхэх гэж байна гэв. Тэгээд Дивамгара тэр хүнийг маш их өрөвдөж тосгон руу буцаж бадар бариад хоол олдвол авчирья. Харин тэр болтол энэ хүн өнгөрчих байх даа. Тэрнээс өмнө өөрийн биеийн махаа огтлоод өгвөл амьтай байж магад гээд махаа огтлоод үүнийг идэж амиа тэжээ гээд өгтөл өнөө хүн:
Би хүний мах идэхгүй, ялангуяа номтны махыг бүр идэхгүй гэв. Тэгээд номтон дотроо Хутагтийн мөрийг олох хүртэл хамаг амьтан зовлонгийн нөхцөлөөр үхэж байна. Би дараагийн төрөл тутамдаа хамаг амьтан өлсөхийн зовлонг зүрхэндээ авах болно гэж хэлээд ихэд уйлав.
Тэгтэл тэр агшин газар хөдлөн их гэрлээр солонгороод огторгуйгаас хүчит дуу гаран онцгой үзэгдэл гарав гэнэ. Энэ ямар учиртай юм бол гээд лам нулимстай нүдээ арчаад хартал өмнө нь арван тавны саран дэвсгэрт хутагт Жанрайсиг бурхан гэрэл цацраан харагдав.
Жанрайсиг бурхан: юу болов хэмээн зарлиг асуухад хүн өлсөж үхэхийг харлаа гээд учир явдлаа хэлэв гэнэ. Жанрайсиг бурханы мэлмийнээс рашаан урсан баруунаас дарь эх гарч, зүүнээс цагаан Замбал гарахад номтон лам маш ихээр таалан баярлаад:
Замбал бурханы магтаалыг зохиов. Тэрхүү магтаалд амьтны хоосролыг арилгах, ертөнцөд буй есөн хүслийг дэлгэрүүлэх, эрхэнд хураан өлсөж ундаасахын зовлонг амирлуулах эдийн шидийг хайрлах тухай бадаг шүлэг зохиосон гэдэг. Замбалын магтаал шүлгийг айлдсан даруйд Замбал бурханаас сувдаар хур буун хүн хийгээд бүхий л амьтдын үгүйрлийн зовлонг арилган номтон ламд адис авшиг увдислажээ.
Тэр цагаас хойш Замбал бурханыг тахин шүтэж анхааран авбаас энэ насанд гачигдах зүйлгүй эцэс хойтдоо диваажинд төрөх тус эрдэмтэй гэгддэг. Замбал бурханыг үргэлжид шүтье гэвэл хөрөг зураг тухайлан бүтээлгэж өмнө нь заавал усан тахил эсвэл гуулин бурхан бүтээлгэвээс аяганд ус хийж дотор нь эдийн бурханаа хийх ёстой. Бас балин хийж өргөдөг.
Тарни: Ум замбала залиндая суха. Өдөр бүр 108 уншваас эдийн тэнгэр таалан баясаж идээ эд тасралтгүй ирнэ гэж бичжээ.Эдийн тэнгэрс ихэвчлэн эрдэнээр бөөлжиж буй хулгана, эдийн болор бумба,эсвэл алгаа дэлгэсэн байдал дүртэй харагддаг.
Даллан дуудах ёстой гурван зарчимд:
Тэнгэрийн урт нас болон эрүүл энх байх
Хүмүүний эрдэм ном, боловсрол
Лусын эд баялаг ба газрын баялгийг бүтээх
